O‘zbekiston 1-apreldan buyon Sirdaryo orqali Qozog‘istonga 3,9 milliard kub metr suv yetkazib berdi. Bu haqda Qozog‘iston Respublikasi Suv xo‘jaligi va irrigatsiya vazirligi matbuot xizmati xabar berdi.
Qayd etilishicha, suv xo‘jaligi va irrigatsiya vaziri Nurjan Nurjigitov O‘zbekiston tomoni bilan Qozog‘istonga 6 oy ichida Sirdaryo orqali 3,7 milliard kub metr suv yetkazib berish bo‘yicha avvalroq kelishuvga erishgan. O‘zbekiston tomoni belgilangan hajmdagi suvni 4 oyda jo‘natib, o‘z majburiyatlarini muddatidan oldin bajardi.
Sug‘orish davri yakuniga qadar O‘zbekiston Qozog‘istonga yana 1 milliard kub metrga yaqin suv berishi kutilmoqda. Bu ishlar Qozog‘istonning janubiy viloyatlari fermerlarining ehtiyojlarini qondirish maqsadida amalga oshirilmoqda.
Bugungi kunda Qozog‘istondagi Chordara suv omborini to‘ldirish hajmi 2,6 milliard kub metrni tashkil etgan bo‘lib, o‘tgan yilga nisbatan 689 million kub metrga ko‘pdir. Chordara suv omboriga jami 3,9 milliard kub metr suv quyilgan.
O‘z navbatida Chordara suv omboridan Sirdaryoning quyi oqimiga 3,6 milliard kub metr suv yuborilgan. Bu o‘tgan yilga nisbatan 950 million kub metrga ko‘pdir. Qizilqum kanaliga 700 million kub metrdan ortiq, Shimoliy Orol dengiziga 400 million kub metrdan ortiq suv quyilgan.
O‘zbekiston suv xo‘jaligi vazirligi axborot xizmati rahbari Shuhrat Suyunovning “Daryo”ga ma’lum qilishicha, suv yetkazib bo‘yicha davlatlararo kelishuv, daryodan suv olish limitlari bor. Kelishuvga ko‘ra, davlatlar o‘ziga tegishli suvni olishi kerak. O‘zbekistonda 2024-yilda suv tanqis emas. Qozog‘iston o‘z ulushini olmoqda.
O‘zbekiston, Qozog‘iston, Qirg‘iziston, Tojikiston, Turkmaniston vakillari ishtirok etgan davlatlararo suv xo‘jaligini muvofiqlashtiruvchi komissiyasining 86-yig‘ilishida Qozog‘iston 2024-yilgi sug‘orish mavsumida O‘zbekistondan Do‘stlik kanali orqali qancha suv olishi ma’lum qilingandi.
Izoh (0)