Davlatlararo suv xo‘jaligini muvofiqlashtirish komissiyasi Amudaryo va Sirdaryo havzasi bo‘yicha 2023-2024-yillar kuz-qish mavsumi uchun suv olish bo‘yicha prognoz limitlarini tasdiqladi. Bu haqda O‘zbekiston suv xo‘jaligi vazirligi axborot xizmati “Daryo”ga maʼlum qildi.
Toshkent shahrida 1-2-noyabr kunlari Davlatlararo suv xo‘jaligini muvofiqlashtirish komissiyasining 85-yig‘ilishi bo‘lib o‘tdi.
Aytilishicha, tadbirda Tojikiston, Turkmaniston, Qozog‘iston, O‘zbekiston delegatsiyalari, komissiyaning ijro etuvchi organlari hisoblangan Amudaryo va Sirdaryo havzalari suv xo‘jaligi birlashmalari, shuningdek, komissiya kotibiyati va ilmiy-axborot markazi rahbarlari ishtirok etgan.
“Yig‘ilishda mintaqada mavjud suv resurslaridan samarali va oqilona foydalanish, Orolbo‘yi hududida suv va ekologik vaziyatni yaxshilash, 2023-2024-yillarda kuz-qish mavsumi uchun suv olish bo‘yicha prognoz limitlar bilan bog‘liq masalalar ko‘rib chiqildi hamda hisobotlar eshitildi.
Komissiya aʼzolari davlatlarning Amudaryo va Sirdaryo havzasi bo‘yicha 2023-2024-yillar kuz-qish mavsumi uchun suv olish bo‘yicha prognoz limitlarini tasdiqladi”, deyiladi vazirlik axborotida.
“Kazinform” xalqaro axborot agentligining maʼlum qilishicha, 2024-yil 1-aprelgacha Qozog‘istonning Turkiston va Qizilo‘rda viloyatlariga 11 kilometr/kubdan ortiq suv beriladi.
Maʼlumot uchun, davlatlararo suv xo‘jaligini muvofiqlashtiruvchi komissiyaning navbatdagi 86-yig‘ilishini 2024-yilning yanvar oyida Qozog‘iston o‘tkazishga kelishib olingan.
Izoh (0)