Ўзбекистон 1 апрелдан буён Сирдарё орқали Қозоғистонга 3,9 миллиард куб метр сув етказиб берди. Бу ҳақда Қозоғистон Республикаси Сув хўжалиги ва ирригация вазирлиги матбуот хизмати хабар берди.
Қайд этилишича, сув хўжалиги ва ирригация вазири Нуржан Нуржигитов Ўзбекистон томони билан Қозоғистонга 6 ой ичида Сирдарё орқали 3,7 миллиард куб метр сув етказиб бериш бўйича аввалроқ келишувга эришган. Ўзбекистон томони белгиланган ҳажмдаги сувни 4 ойда жўнатиб, ўз мажбуриятларини муддатидан олдин бажарди.
Суғориш даври якунига қадар Ўзбекистон Қозоғистонга яна 1 миллиард куб метрга яқин сув бериши кутилмоқда. Бу ишлар Қозоғистоннинг жанубий вилоятлари фермерларининг эҳтиёжларини қондириш мақсадида амалга оширилмоқда.
Бугунги кунда Қозоғистондаги Чордара сув омборини тўлдириш ҳажми 2,6 миллиард куб метрни ташкил этган бўлиб, ўтган йилга нисбатан 689 миллион куб метрга кўпдир. Чордара сув омборига жами 3,9 миллиард куб метр сув қуйилган.
Ўз навбатида Чордара сув омборидан Сирдарёнинг қуйи оқимига 3,6 миллиард куб метр сув юборилган. Бу ўтган йилга нисбатан 950 миллион куб метрга кўпдир. Қизилқум каналига 700 миллион куб метрдан ортиқ, Шимолий Орол денгизига 400 миллион куб метрдан ортиқ сув қуйилган.
Ўзбекистон сув хўжалиги вазирлиги ахборот хизмати раҳбари Шуҳрат Суюновнинг “Дарё”га маълум қилишича, сув етказиб бўйича давлатлараро келишув, дарёдан сув олиш лимитлари бор. Келишувга кўра, давлатлар ўзига тегишли сувни олиши керак. Ўзбекистонда 2024 йилда сув танқис эмас. Қозоғистон ўз улушини олмоқда.
Ўзбекистон, Қозоғистон, Қирғизистон, Тожикистон, Туркманистон вакиллари иштирок этган давлатлараро сув хўжалигини мувофиқлаштирувчи комиссиясининг 86-йиғилишида Қозоғистон 2024 йилги суғориш мавсумида Ўзбекистондан Дўстлик канали орқали қанча сув олиши маълум қилинганди.
Изоҳ (0)