2023 yilda dunyodagi och odamlar soni taxminan 733 millionni tashkil etdi, bu Yer yuzidagi har 11-inson ochlikdan aziyat chekkanini anglatadi. Afrika qit’asidagi har beshinchi odam och qolgan.
Bunday xulosalar Oziq-ovqat va qishloq xo‘jaligi tashkiloti (FAO) va BMTning boshqa gumanitar ixtisoslashgan agentliklarining “Dunyoda oziq-ovqat xavfsizligi va oziqlanish holati” (SOFI) yillik hisobotida keltirilgan.
Hisobotda aytilishicha, global inqiroz chuqurlashar ekan, och qolganlar soni ketma-ket uch yil davomida yuqoriligicha qolmoqda. Shuningdek, dunyo bu borada 15 yil orqaga chekingani, to‘yib ovqatlanmaslik darajasi 2008—2009-yillardagi darajaga qaytgani aytiladi.
Bundan tashqari, 2019-yildan beri to‘yib ovqatlanmaydiganlar soni qariyb 152 millionga ko‘paygan.
2023-yilda dunyo bo‘ylab 2,33 milliardga yaqin odam o‘rtacha yoki og‘ir darajada oziq-ovqat ta’minotidan aziyat chekdi, bu ko‘rsatkich 2020-yilda COVID-19 pandemiyasi davrida keskin o‘sishdan keyin deyarli o‘zgarmadi. Afrikada aholining yarmidan ko‘pi (58 foiz) o‘rtacha yoki og‘ir darajada oziq-ovqat ta’minoti yetishmasligi sharoitida yashaydi.
Dunyoda sog‘lom ovqatlanish bilan bog‘liq muammolar saqlanib qolmoqda. 2022-yilda 2,8 milliarddan ortiq odam sog‘lom oziq-ovqat sotib ololmadi. Kam daromadli mamlakatlarda aholining 71,5 foizi sog‘lom oziq-ovqat mahsulotlariga ega emas, yuqori daromadli mamlakatlarda esa bu ko‘rsatkich 6,3 foizni tashkil etadi.
Izoh (0)