“G‘arb Rossiya bilan to‘g‘ridan to‘g‘ri harbiy mojaroga tayyorlanmoqda” — Serbiya prezidenti

G‘arb davlatlari hozirda Rossiya bilan to‘g‘ridan to‘g‘ri mojaroga kirishish uchun faol tayyorgarlik ko‘rmoqda. Bu haqda Serbiya prezidenti Aleksandr Vuchich bergan bayonotga asoslanib, “TASS” nashri xabar berdi.

Vuchichga ko‘ra, G‘arb Rossiya bilan proksi urushni qo‘llab kelgan. Rossiya bilan bevosita keskinlikka bormasdan Moskvaga qarshi bo‘lgan Sharqiy Yevropa hukumatlari pul va qurol-yarog‘ bilan taʼminlab kelingan. Ammo endilikda ushbu strategiya ish bermagani ortidan mamlakatlar yangi keskinlikka tayyorgarlik ko‘rmoqda.

“G‘arb masofa saqlagan holda, ikkilamchi kuchlar orqali, pul investitsiya qilish hamda qurol jo‘natish yo‘li bilan urush olib borishni xohlaydi, hozirda ular Rossiya bilan to‘g‘ridan-to‘g‘ri to‘qnashuvga tayyor emas. Bu faqat hozircha. Menimcha, ular allaqachon Rossiya Federatsiyasi bilan mojaroga tayyorgarlik ko‘rishmoqda. Bu tayyorgarlik katta surʼatlarda davom etmoqda”,  degan prezident Vuchich Pink telekanaliga bergan intervyusida.

Serbiya rahbari Ukraina masalasida fikr bildirib, mojaro hali cho‘zilishini bildirgan. Ukraina sharqiy frontida faqat ukrainlar halok bo‘layotgan, mojaro G‘arbiy Yevropa aholisiga tahdid solmayotgan ekan, keskinlik hali davom etishi mumkinligi aytilgan.

“Toki G‘arb aholisi orasida o‘limlar sodir bo‘lmayotgan ekan, faqat ko‘ngillilar urushda halok bo‘layotgan ekan, urush cho‘ziladi. G‘arb uchun qancha ukrainaliklar o‘layotgani hech qanday ahamiyatga ega emas”,  degan Serbiya prezidenti.

Belgraddagi hukumat rahbari Rossiya uchun iqtisodiy cheklovlar katta zarba bo‘lolmasligini aytgan. Chunki Kreml qo‘l ostidagi yerlarda barcha zarur xomashyo manbalari va resurslar mavjud. Shu sababli ham mamlakatga kiritilgan sanksiyalar amalda hech qanday foyda bermagan.

“Rossiyada juda ko‘p neft, gaz, fosfor, oltin va kumush — ruslarga kerak bo‘lgan barcha resurs bor. Ularni sanksiya bilan yengib bo‘lmaydi”, degan Vuchich.

Vuchich, shuningdek, Skandinaviya davlatlarida ko‘tarilgan Rossiyani hududiy qayta bo‘lish, Moskva buncha katta hududga munosib emasligi haqidagi muhokamalarni tanqid qilgan. Bu keskin bayonot ekanligi, alaoqibat Moskvani jiddiy qadamlar qo‘yishga majburlashi mumkinligini bildirgan.