Nigeriya regulyatori shaxsiy maʼlumotlardan foydalanish qoidalarini buzgani uchun Amerikaning Meta Platforms Inc kompaniyasini (sobiq Facebook) jarimaga tortdi. Bu haqda Deutsche Welle xabar berdi.
Nigeriya Raqobat va iste’molchilar huquqlarini himoya qilish federal komissiyasi (FCCPC) Meta’ni kamsitish amaliyotida, bozorda ustun mavqeni suiiste’mol qilishda, nigeriyaliklarning shaxsiy ma’lumotlarini ruxsatsiz uzatishda va nigeriyaliklarga ularning ma’lumotlaridan qanday foydalanishni aniqlash huquqini bermaganlikda aybladi.
Komissiya 2021-yil may oyidan keyin boshlangan 38 oylik tergovda “ahamiyatli dalillar” borligini ma’lum qildi. FCCPC bosh ijrochi direktori Adam Abdullahi texnologik gigant “amaldagi qonunchilikka rioya etishni, nigeriyalik iste’molchilarni ekspluatatsiya qilishni va bozordagi suiiste’molchiliklarni to‘xtatishi” kerakligini aytdi. Komissiya kompaniyaga “kelgusida milliy standartlarga mos kelmaydigan bunday yoki boshqa xatti-harakatlardan/amaliyotlardan tiyilishni” buyurdi.
FCCPC, shuningdek, Meta tergovdan xabardor ekanini ma’lum qildi. Bunga javoban kompaniya “vaziyatni to‘g‘irlash bo‘yicha chora-tadbirlar to‘plamini” taklif qildi, ammo bu dastlabki xavotirlarni bartaraf etmadi.
Eslatib o‘tamiz, Afrikaning eng ko‘p aholisi bo‘lgan Nigeriyada jami 200 million aholidan 164 millionga yaqin internet obunachisi bor.
Nigeriyaliklarning to‘rtdan uch qismi 24 yoshgacha bo‘lgan va ularning ko‘pchiligi ijtimoiy tarmoqlarda “ulg‘aygan”. WhatsApp, Facebook va Instagram Nigeriyadagi eng mashhur ijtimoiy media platformalaridan biri hisoblanadi.
Izoh (0)