“Ғарб Россия билан тўғридан тўғри ҳарбий можарога тайёрланмоқда” — Сербия президенти

Ғарб давлатлари ҳозирда Россия билан тўғридан тўғри можарога киришиш учун фаол тайёргарлик кўрмоқда. Бу ҳақда Сербия президенти Александр Вучич берган баёнотга асосланиб, “ТАСС” нашри хабар берди.

Вучичга кўра, Ғарб Россия билан прокси урушни қўллаб келган. Россия билан бевосита кескинликка бормасдан Москвага қарши бўлган Шарқий Европа ҳукуматлари пул ва қурол-яроғ билан таъминлаб келинган. Аммо эндиликда ушбу стратегия иш бермагани ортидан мамлакатлар янги кескинликка тайёргарлик кўрмоқда.

“Ғарб масофа сақлаган ҳолда, иккиламчи кучлар орқали, пул инвестиция қилиш ҳамда қурол жўнатиш йўли билан уруш олиб боришни хоҳлайди, ҳозирда улар Россия билан тўғридан-тўғри тўқнашувга тайёр эмас. Бу фақат ҳозирча. Менимча, улар аллақачон Россия Федерацияси билан можарога тайёргарлик кўришмоқда. Бу тайёргарлик катта суръатларда давом этмоқда”,  деган президент Вучич Пинк телеканалига берган интервьюсида.

Сербия раҳбари Украина масаласида фикр билдириб, можаро ҳали чўзилишини билдирган. Украина шарқий фронтида фақат украинлар ҳалок бўлаётган, можаро Ғарбий Европа аҳолисига таҳдид солмаётган экан, кескинлик ҳали давом этиши мумкинлиги айтилган.

“Токи Ғарб аҳолиси орасида ўлимлар содир бўлмаётган экан, фақат кўнгиллилар урушда ҳалок бўлаётган экан, уруш чўзилади. Ғарб учун қанча украиналиклар ўлаётгани ҳеч қандай аҳамиятга эга эмас”,  деган Сербия президенти.

Белграддаги ҳукумат раҳбари Россия учун иқтисодий чекловлар катта зарба бўлолмаслигини айтган. Чунки Кремль қўл остидаги ерларда барча зарур хом ашё манбалари ва ресурслар мавжуд. Шу сабабли ҳам мамлакатга киритилган санкциялар амалда ҳеч қандай фойда бермаган.

“Россияда жуда кўп нефть, газ, фосфор, олтин ва кумуш — русларга керак бўлган барча ресурс бор. Уларни санкция билан енгиб бўлмайди”, деган Вучич.

Вучич, шунингдек, Скандинавия давлатларида кўтарилган Россияни ҳудудий қайта бўлиш, Москва бунча катта ҳудудга муносиб эмаслиги ҳақидаги муҳокамаларни танқид қилган. Бу кескин баёнот эканлиги, алаоқибат Москвани жиддий қадамлар қўйишга мажбурлаши мумкинлигини билдирган.