Ijtimoiy tarmoqlarda davlat raqam belgisi 01 505 ODA bo‘lgan Captiva avtomashinasi voyaga yetmagan fuqaro tomonidan boshqarilgani aks etgan video tarqaldi. Holat yuzasidan Toshkent shahar IIBB Yo‘l harakati xavfsizligi boshqarmasi axborot xizmati munosabat bildirdi.
Maʼlum qilinishicha, holat Toshkent shahar Yo‘l harakati xavfsizligi boshqarmasi xodimlari tomonidan o‘rganilgan. Mazkur harakatlarni Toshkent shahar Sergeli tumanida istiqomat qiluvchi voyaga yetmagan, 2012-yilda tug‘ilgan fuqaro A.B. sodir etganligi aniqlandi.
Voyaga yetmagan shaxsga avtomashinani boshqarish uchun topshirgan fuqaro 1977-yilda tug‘ilgan U.A.ga nisbatan MJtKning 135-moddasi 2-qismiga (transport vositalarining boshqarish huquqi bo‘lmagan shaxslarning shu vositalarni boshqarishi, xuddi shuningdek, boshqarish huquqi bo‘lmagan shaxsga transport vositalarni boshqarishning topshirilishi) muvofiq maʼmuriy bayonnoma rasmiylashtirilib, avtomashina vaqtinchalik saqlash uchun jarima maydoniga joylashtirildi.
Izoh (0)