Toshkentdagi janjalda fuqaro avtomobilini odamlar ustiga haydagani haqida xabar berilgan edi. Bosh prokuratura axborot xizmati rahbari Hayot Shamsutdinov “Daryo”ga voqea tafsilotlarini maʼlum qildi.
Unga ko‘ra, janjalda to‘rt kishi jarohatlangan:
- 47 yoshli T.J.ga — o‘ng son sohasi sanchilib kesilgan jarohati;
- 22 yoshli F.R.ga — chap son sohasi sanchilib kesilgan jarohati;
- 20 yoshli I.U.ga — o‘ng son sohasi sanchilib kesilgan jarohati;
- 19 yoshli B.P.ga — chap qo‘l bilak sohasi shilingan jarohati tashxisi qo‘yilgan.
Ularga tan jarohatlarni bezorilik moddasi bilan muqaddam ikki marotaba sudlangan, iyun oyning oxirlarida jazoni ijro etish koloniyasidan ozod etilgan 20 yoshli K.F., muqaddam sudlangan 21 yoshli B.A., hozirda shaxsni aniqlashning imkoni bo‘lmagan Hasan va Husan aka ukalar hamda Nodir ismli shaxs bilan bir guruhga birlashib yetkazgani aniqlangan.
3-iyul kuni soat taxminan 19:00 larda 19 yoshli B.P.dan unga oldindan tanish bo‘lgan K.F. hech qanday sabablarsiz 1 million so‘m pul talab qilgan. Mazkur holatni jabrlangan yigit o‘zining uch nafar tanishiga yetkazgan va ular BYD Song Plus avtomobilida Sergeli tumani, Qo‘yliq 5-dahasidagi uy oldiga kelgan.
Shu yerda bo‘lgan K.F. va B.A. hamda hozirda shaxsini aniqlashning imkoni bo‘lmagan Hasan va Husan aka-ukalar va Nodir ismli shaxs jabrlanuvchilardan 1 million so‘mni hech qanday arzigulik sabablarsiz talab qilgani sababli o‘zaro janjallashgan va pul talab qilgan shaxslar to‘rt nafar jabrlanuvchi tanasining turli joylariga tan jarohatlari yetkazgan.
Pul talab qilgan shaxslar jarohat olgan jabrlanuvchilar qochish uchun avtomashinada harakatlangan payti faol qarshilik ko‘rsatgan. Avtomashinaning turli yerlariga qo‘l va oyoqlari bilan zarba berib, avtomashinani nosoz holatga keltirgan.
IIB xodimlari K.F.ni yashash xonadonidan hodisa sodir bo‘lgan yerga chaqirganda u takroran IIB xodimlarining talablariga bo‘ysunmasdan yonida bo‘lgan “pakki” pichog‘i bilan o‘ziga va boshqalarga tan jarohati yetkazish bilan qo‘rqitgan. Shu yerda bo‘lgan xodimlarga oldiga kelmaslikni aytib, agarda kelsa, pichoq bilan tan jarohati yetkazishini bildirib, IIB xodimlariga turli haqoratomuz so‘zlarni aytgan.
So‘ng o‘zining bo‘yin sohasi o‘ng tomoniga pichoq bilan tan jarohati yetkazgan. IIB xodimlarining sa’y-harakatlari bilan uning qo‘lidaga pichoq olib qo‘yilgan.
Hozirda holat yuzasidan Sergeli tumani IIO FMB huzuridagi TB tomonidan Jinoyat kodeksining 277-moddasi (bezorilik) 2-qismi “b,v” bandlari bilan jinoyat ishi qo‘zg‘atilgan. Tergov harakatlari olib borilmoqda.
Izoh (0)