Тошкентдаги жанжалда фуқаро автомобилини одамлар устига ҳайдагани ҳақида хабар берилган эди. Бош прокуратура ахборот хизмати раҳбари Ҳаёт Шамсутдинов “Дарё”га воқеа тафсилотларини маълум қилди.
Унга кўра, жанжалда тўрт киши жароҳатланган:
- 47 ёшли Т.Ж.га — ўнг сон соҳаси санчилиб кесилган жароҳати;
- 22 ёшли Ф.Р.га — чап сон соҳаси санчилиб кесилган жароҳати;
- 20 ёшли I.У.га — ўнг сон соҳаси санчилиб кесилган жароҳати;
- 19 ёшли Б.П.га — чап қўл билак соҳаси шилинган жароҳати ташхиси қўйилган.
Уларга тан жароҳатларни безорилик моддаси билан муқаддам икки маротаба судланган, июнь ойнинг охирларида жазони ижро этиш колониясидан озод этилган 20 ёшли К.Ф., муқаддам судланган 21 ёшли Б.А., ҳозирда шахсни аниқлашнинг имкони бўлмаган Ҳасан ва Ҳусан ака укалар ҳамда Нодир исмли шахс билан бир гуруҳга бирлашиб етказгани аниқланган.
3 июль куни соат тахминан 19:00 ларда 19 ёшли Б.П.дан унга олдиндан таниш бўлган К.Ф. ҳеч қандай сабабларсиз 1 миллион сўм пул талаб қилган. Мазкур ҳолатни жабрланган йигит ўзининг уч нафар танишига етказган ва улар BYD Song Plus автомобилида Сергели тумани, Қўйлиқ 5-даҳасидаги уй олдига келган.
Шу ерда бўлган К.Ф. ва Б.А. ҳамда ҳозирда шахсини аниқлашнинг имкони бўлмаган Ҳасан ва Ҳусан ака-укалар ва Нодир исмли шахс жабрланувчилардан 1 миллион сўмни ҳеч қандай арзигулик сабабларсиз талаб қилгани сабабли ўзаро жанжаллашган ва пул талаб қилган шахслар тўрт нафар жабрланувчи танасининг турли жойларига тан жароҳатлари етказган.
Пул талаб қилган шахслар жароҳат олган жабрланувчилар қочиш учун автомашинада ҳаракатланган пайти фаол қаршилик кўрсатган. Автомашинанинг турли ерларига қўл ва оёқлари билан зарба бериб, автомашинани носоз ҳолатга келтирган.
ИИБ ходимлари К.Ф.ни яшаш хонадонидан ҳодиса содир бўлган ерга чақирганда у такроран ИИБ ходимларининг талабларига бўйсунмасдан ёнида бўлган “пакки” пичоғи билан ўзига ва бошқаларга тан жароҳати етказиш билан қўрқитган. Шу ерда бўлган ходимларга олдига келмасликни айтиб, агарда келса, пичоқ билан тан жароҳати етказишини билдириб, ИИБ ходимларига турли ҳақоратомуз сўзларни айтган.
Сўнг ўзининг бўйин соҳаси ўнг томонига пичоқ билан тан жароҳати етказган. ИИБ ходимларининг саъй-ҳаракатлари билан унинг қўлидага пичоқ олиб қўйилган.
Ҳозирда ҳолат юзасидан Сергели тумани ИИО ФМБ ҳузуридаги ТБ томонидан Жиноят кодексининг 277-моддаси (безорилик) 2-қисми “б,в” бандлари билан жиноят иши қўзғатилган. Тергов ҳаракатлари олиб борилмоқда.
Изоҳ (0)