Toshkentdagi mehmonxonalarning birida janjal ko‘targan qizlarga 10 sutka ma’muriy qamoq jazosi tayinlandi.
Aniqlanishicha, uch nafar shaxs N.SH., Q.G‘., va B.N., jamiyatda o‘rnatilgan yurish-turish qoidalarini mensimasdan 14-iyun kuni soat 05:30 atrofida Chilonzor tumanida joylashgan Istem 5 star Hotel mehmonxonasi oldida ikki nafar shaxs bilan janjallashib, baqir-chaqir qilib, shu atrofda yashovchi aholining osoyishtaligini buzgan.
“UzNews’ning Toshkent shahar sudlariga tayanib yozishicha, IIB xodimlari tomonidan ushbu holatga oydinlik kiritish maqsadida uch nafar huquqbuzar 23-iyun kuni Chilonzor tumani IIO FMBga yetib kelishi to‘g‘risida chaqiruv xati berilgan bo‘lishiga qarmasdan, ular IIO xodimlarining qonuniy talablarini bajarmagan.
Sud qaroriga ko‘ra, N.SH., Q.G‘., va B.N. Ma’muriy javobgarlik to‘g‘risidagi kodeksning 183-moddasi (mayda bezorilik) va 194-moddasi (O‘zbekiston Respublikasi Milliy gvardiyasi harbiy xizmatchisining (xodimining) qonuniy talablarini bajarmaslik) 1-qismida nazarda tutilgan huquqbuzarliklarni sodir qilishgan deb topilgan va ularga nisbatan 10 sutka maʼmuriy qamoq jazosi tayinlangan.
Bir necha kun oldin Toshkent shahar Bektemir tumani “Chashma” mahallasida istiqomat qiluvchi bir-biriga qo‘shni bo‘lgan fuqarolar o‘zaro kelishmovchilik sababli janjallashgani to‘g‘risida xabar berilgandi. Natijada ikki nafar fuqaro yengil darajadagi jarohat olgan. Undan oldinroq esa ijtimoiy tarmoqda Olmaliqda ayollar guruh bo‘lib janjallashayotgani aytilgan videolar tarqalgan edi.
Izoh (0)