Oxirgi 24 soat ichida Ukrainaning turli hududlariga uyushtirilgan havo hujumlari natijasida 8 kishi halok bo‘ldi, kamida 55 kishi jarohatlandi. Bu haqda Ukraina rasmiylariga tayanib, Anadolu xabar berdi.
Dnepropetrovsk viloyati harbiy ma’muriyati rahbari Sergey Lisak Dneprda 3-iyul kuni raketa hujumi natijasida halok bo‘lganlar soni 5 kishiga yetganini ma’lum qilgan.
Rossiyaning Dneprga ertalabki hujumi tufayli 5 kishi halok bo‘ldi. 27 kishi jarohatlangan. Ulardan 11 nafari kasalxonaga yotqizilgan. Ikki nafari og‘ir ahvolda, — deb yozgan Lisak Telegram’da.
Bundan tashqari, viloyat prokuraturasi matbuot xizmati Xarkov viloyati, Izyum tumani, Borovayaning markaziy qismiga uyushtirilgan hujumlar natijasida halok bo‘lganlar va jarohatlanganlar borligi haqida xabar bergan.
Fuqarolik infratuzilmalari, xususan, 10 dan ortiq turar joy binolari, yordamchi binolar, do‘konlar va ma’muriy binolar zarar ko‘rgan. 48 yoshli erkak halok bo‘ldi, uning jasadi uy vayronalari ostidan topilgan. 75 yoshli ayol o‘tkir stressni boshdan kechirdi, 50 yoshli erkak esa jarohat oldi, — deyiladi xabarda.
Ukraina rasmiylari bir kun ichida ruslar Donetsk viloyatidagi aholi punktlarini 26 marta havodan o‘qqa tutgani haqida xabar bergan. Hodisa oqibatida 351 kishi, jumladan, 34 nafar bola frontdan evakuatsiya qilingan.
Xerson viloyat harbiy boshqarmasi boshlig‘i Aleksandr Prokudin viloyatda so‘nggi 24 soat ichida havo hujumlari oqibatida bir kishi halok bo‘lgani, yana 15 kishi yaralanganini aytgan.
Xarkov viloyatining “Russkaya Lozovaya Dergachiv” mahalla fuqarolar yig‘inidagi turar joy binosi ham jabrlangan, kamida uchta qurbon. Bir kishining ahvoli og‘ir, deya Davlat harbiy boshqarmasi rahbari Vyacheslav Zadorenko xabar bergan.
Izoh (0)