Gruziya prezidenti Salome Zurabishvili milliy terma jamoa futbolchilari, jamoa murabbiylar shtabi va futbol federatsiyasi vakillarini 2024-yilgi Yevropa chempionati 1/8 final bosqichiga chiqqani uchun “Shon-sharaf” ordeni bilan taqdirladi, deb yozadi “TASS”.
Manbaga ko‘ra, taqdirlash marosimi Ozodlik maydoniga o‘rnatilgan sahnada bo‘lib o‘tgan. Maydon sari yo‘lda milliy terma jamoa futbolchilari ochiq avtobusga minib, minglab muxlislar qarshisiga chiqdi.
Muxlislar o‘yinchilarni kutib olishganidan so‘ng, Zurabishvili sahnaga chiqib, milliy jamoa a’zolari va futbol federatsiyasi rahbariyatiga mukofotni topshirdi.
Gruziya terma jamoasi guruh bosqichida Portugaliya (6 ochko), Turkiya (6 ochko) va Chexiya (1 ochko) bilan bahslashdi va uchinchi o‘rinni (4 ochko) egalladi. 1/8 final bosqichida gruziyaliklar Ispaniyaga 1:4 hisobida imkoniyatni boy berdi.
Gruziya terma jamoasi tarixda ilk bor Yevropa chempionati final bosqichiga chiqdi.
Germaniyada Yevropa chempionati 14-iyundan 14-iyulga qadar bo‘lib o‘tadi. Amaldagi chempion Italiya termasi Yevro—2020 finalida Angliya terma jamoasini mag‘lub etgan edi.
Izoh (0)