Грузия президенти Саломе Зурабишвили миллий терма жамоа футболчилари, жамоа мураббийлар штаби ва футбол федерацияси вакилларини 2024 йилги Европа чемпионати 1/8 финал босқичига чиққани учун “Шон-шараф” ордени билан тақдирлади, деб ёзади “ТАСС”.
Манбага кўра, тақдирлаш маросими Озодлик майдонига ўрнатилган саҳнада бўлиб ўтган. Майдон сари йўлда миллий терма жамоа футболчилари очиқ автобусга миниб, минглаб мухлислар қаршисига чиқди.
Мухлислар ўйинчиларни кутиб олишганидан сўнг, Зурабишвили саҳнага чиқиб, миллий жамоа аъзолари ва футбол федерацияси раҳбариятига мукофотни топширди.
Грузия терма жамоаси гуруҳ босқичида Португалия (6 очко), Туркия (6 очко) ва Чехия (1 очко) билан баҳслашди ва учинчи ўринни (4 очко) эгаллади. 1/8 финал босқичида грузияликлар Испанияга 1:4 ҳисобида имкониятни бой берди.
Грузия терма жамоаси тарихда илк бор Европа чемпионати финал босқичига чиқди.
Германияда Европа чемпионати 14 июндан 14 июлга қадар бўлиб ўтади. Амалдаги чемпион Италия термаси Евро—2020 финалида Англия терма жамоасини мағлуб этган эди.
Изоҳ (0)