Hindistonning Uttar-Pradesh shtatida kamida 107 kishi halok bo‘ldi. Bunga diniy marosim chog‘idagi tiqilinch sabab bo‘lgan. Bu haqda Hindustan Times huquq-tartibot idoralari xodimlariga tayanib, xabar berdi.
Ma’lumotlarga ko‘ra, halok bo‘lganlarning aksariyati ayollar bo‘lgan. Omon qolganlardan birining nashrga aytishicha, tiqilinch voiz Bhole Babaning murojaatidan keyin boshlangan. Tashqarida yo‘lni to‘sib qo‘ygan mashina ham bo‘lgan.
Etah tumani bosh shifokori Umesh Kumar Tripatining tushuntirishicha, jabrlanganlarning bir qismi allaqachon tibbiy muassasalarga yetkazilgan.
Politsiya ma’lumotlariga ko‘ra, tiqilinch odamlarning haddan tashqari ko‘pligi tufayli yuzaga kelgan bo‘lishi mumkin.
2023-yil noyabr oyi oxirida Hindistonning Kerala shtatining Kochin shahrida universitet musiqa festivalida yuz bergan tiqilinch oqibatida to‘rt kishi halok bo‘lgan edi. Press Trust of India agentligi musiqa festivali ochiq havoda o‘tkazilgani va unda 2 mingdan ortiq kishi ishtirok etgani haqida xabar bergan.
Izoh (0)