Yaman poytaxti Sano markazida xayriya tadbiri chog‘ida yuz bergan tiqilinchda 50 dan ortiq odam halok bo‘ldi, deb xabar bermoqda Al Arabiya.
Shu bilan birga, mamlakat Sog‘liqni saqlash vazirligi rasmiylarining aytishicha qurbonlar soni kamida 80 kishini tashkil qilmoqda.
Jurnalistlar ma’lumotlariga ko‘ra, odamlar Bob al-Yaman tumanida tadbirkorlardan moddiy yordam — zakot olish uchun yig‘ilgan. Yuzlab odamlar tor ko‘chada to‘planib, pul tarqatilayotgan joyga yaqinlashishga uringan.
“Avvaliga o‘q ovozlari eshitildi, keyin qisqa tutashuv sodir bo‘ldi, natijada chiroqlar o‘chdi, bu esa vahima va tiqilinchga sabab bo‘ldi”, — deydi manba.
Dastlabki ma’lumotlarga ko‘ra, fojia bir harakat ortidan sodir bo‘lgan. Yordam tarqatuvchilardan biri olomonni tinchlantirish uchun havoga o‘q uzgan, biroq o‘q elektr simiga tegib ketgan. Bundan qo‘rqib ketgan odamlar vahima ko‘tarishgan, keyin tiqilinch boshlangan.
Zakot ikki savdogar tomonidan tarqatilayotgan edi. Politsiya ularni hibsga olgan. Ular “Ichki ishlar vazirligi bilan kelishilmagan holda va tashkilotsiz pul mablag‘larini tartibsiz tarqatish”da ayblanmoqda.
Izoh (0)