“Аҳоли ўзи ёки маҳалла учун электр ишлаб чиқармоқчи бўлса, муаммо йўқ” — “Ўзбекгидроэнерго” АЖ масъули

Ўзбекистонда 2022 йилга қадар аҳоли ўз эҳтиёжини қондириши учун ҳам электр “ток”и ишлаб чиқарса, таъқиб қилинган. Бу иш хато саналиб, ҳуқуқий асос яратилмагани айтилган. Президентнинг 2022 йилдаги фармонидан сўнг, ўз эҳтиёжи, шунингдек, сотиши учун электр энергияси ишлаб чиқарувчи тадбиркорлар рағбатлантирилиши, уларга қўшимча имкониятлар яратиб берилиши эълон қилинди.

“Ўзбекгидроэнерго” масъуллари иштирокида бўлиб ўтган матбуот анжуманида айни шу масалада сўз борди, дея хабар берди “Дарё” журналисти. 

Фото: “Ўзбекгидроэнерго” АЖ ахборот хизмати

Матбуот анжуманида сўз олган “Дарё” журналисти масъулларга юзланиб, давлат раҳбари фармонидан сўнг, 10 йиллар аввал ҳам чекка қишлоқларда ўзи учун электр “ток”и ишлаб чиқариб, масъуллар таъқибидан қочиб, ишини тўхтатган ҳамда бугунги кунда имконият яратилганидан илҳомланган аҳоли қандай натижаларга эришаётгани билан қизиқди. 

Ўзим яхши биладиган Қашқадарё вилоятининг Кўл қишлоғида яшовчи аҳоли бундан 10 йиллар олдин ҳам ёнидан оқиб ўтган сувлар орқали электр “ток”и ишлаб чиқарган ва эҳтиёжини қондирган. Бироқ масъуллар бу иш хато эканини айтиб, уларни таъқиб қилиши “ток” ишлаб чиқаришнинг ривожланмай қолишига сабаб бўлган. Давлат раҳбари томонидан қонуний асос яратилиб, имкониятлар берилгач, олдин ўзи учун электр ишлаб чиқарган аҳоли бугун қандай натижаларга эришмоқда? — деди журналист. 

“Ўзбекгидроэнерго” АЖнинг хусусий инвесторлар томонидан амалга ошириладиган лойиҳаларни мувофиқлаштириш бошқармаси бошлиғи Авазбек Зокировнинг маълумот беришича, улар 2018—2022 йиллар давомида 10 дан ортиқ микроГЭСларни ишлатиб кўрган ва самарадорлиги юқорилигига гувоҳ бўлган. 

МикроГЭСларни ишлатиб кўрганимизда улар кам сув билан ҳам электр энергияси ишлаб чиқаришига гувоҳ бўлдик. Бу самарадорликни кўрган президентимиз бизга шу ҳақда фармонни қабул қилиб бердилар. Шу асосида ушбу лойиҳа бошланди, — деди Авазбек Зокиров. 

Масъулнинг билдиришича, аҳоли ўзи учун ёки қўни-қўшнилар, маҳалла учун электр энергия ишлаб чиқармоқчи бўлса, ҳеч қандай муаммо йўқ. 

Тадбиркор маҳалласи учун ускуна сотиб олиб, микроГЭС қуриб, маҳалласини электр энергияси билан таъминлаш баробарида, ишлаб чиқарган электр энергиясини сотиши ҳам мумкин, — деди масъул. 

Авазбек Зокировнинг қўшимча қилишича, келажакда Кўл қишлоғида ҳам микроГЭСлар қурилиши мумкин. 

Кўл қишлоғидаги сув гидрологияси бўйича микроГЭС қуриш имкониятини берса, тадбиркор томонидан ёки “Ўзбекгидроэнерго” АЖ томонидан микроГЭС қурилади. Бунда ҳеч қандай муаммо йўқ, — деди у.