Telegram messenjeri 30-iyun kuni 10.14.1 versiyasiga yangilandi, endilikda kanal egalari kontentlarini pullashi, foydalanuvchilar esa yangi funksiyalarga ega Stories qo‘yishi mumkin bo‘ladi. Quyida yangilanishlar haqida batafsil ma’lumot beramiz.
Bir nechta mini-ilovalar bilan ishlash
Telegram maʼlumotlariga ko‘ra, har oy 500 million foydalanuvchi mini-ilovalar bilan ishlaydi. Endi ularni pastki panelga joylashtirish mumkin. Bu messenjerning qolgan funksiyalari bilan ishlash va istalgan qulay vaqtda mini-ilovalarga qaytish imkonini beradi.
Telegram’da kontentlarni pullash
Endilikda kanal egalari messenjerda pullik suratlar yoki videolar joylashtirishi mumkin. Ular uchun to‘lov messenjerning ichki valyutasi — Telegram Stars orqali amalga oshiriladi. Kanal egalari raqamli valyutalarni TON’ga o‘tkazishi yoki undan Telegram Ads platformasi orqali kanalini reklama qilishda foydalanishi mumkin.
Raqamli tovar va xizmatlarga ega bot yaratuvchilar endi TON’da mukofot olishi mumkin bo‘ladi. Telegram Stars’dagi tranzaksiyalardan deyarli hech qanday komissiya olinmaydi, shuning uchun faqat soliqlar va to‘lov tizimi komissiyalari undiriladi.
Stories’ni heshteg va joylashuv bo‘yicha qidirish
Shu paytgacha har qanday chatda #heshtegni bosish orqali qidiruv natijalarini chatlarda va ommaviy kanallarda ko‘rish mumkin edi. Ammo yangilanish bilan endi Stories’larni ham ko‘rish mumkin bo‘ladi. Bundan tashqari, joylashuv belgisini bosish orqali ham Stories’ni qidirish imkoniyati bor.
Stories’larga havola qo‘yish
Telegram Premium foydalanuvchilari endi havolalar bilan birga vidjetlar yaratishi, shuningdek, URL manzili aks etgan matnga o‘zlari so‘z yozishlari mumkin.
Izoh (0)