Toshkent—Xorazm avtoturargohida “antiseptik” niqobi ostida Xorazm viloyatiga jo‘natilayotgan etil spirti to‘xtatib qolindi. Bu haqda Bosh prokuratura huzuridagi departament xabar berdi.
Qayd etilishicha, departamentning Toshkent viloyat boshqarmasi tomonidan IIB xodimlari bilan hamkorlikda Chilonzor tumanidagi Toshkent—Xorazm avtoturargohida tezkor tadbir o‘tkazilgan. Tadbirda fuqaro A.A. boshqaruvidagi Isuzu rusumli yuk avtomashinasi ko‘zdan kechirilganda Farg‘ona viloyatida yashovchi B.T. umumiy bahosi 157,5 million so‘m bo‘lgan 900 dona 5 litrli yelim idishlarga qadoqlangan 4,5 tonna etil spirtining ustiga qalbaki “Antiseptik” yozuvli etiketkalarni yelimlab, Xorazm viloyatida o‘tkazish maqsadida jo‘natgani aniqlangan va ushbu mahsulotlar ashyoviy dalil sifatida olingan.
Mazkur holat yuzasidan Jinoyat kodeksining 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishi qo‘zg‘atilib, tergov harakatlari o‘tkazilmoqda.
- Eslatib o‘tamiz, 2023-yil noyabrda Toshkentda antiseptik uchun mo‘ljallangan 26,3 milliard so‘mlik etil spirti noqonuniy sotib yuborilgani ma’lum bo‘lgandi.
- Shuningdek, Toshkentda 6 ming litr etil spirti sotmoqchi bo‘lgan shaxs ushlangan edi.
Izoh (0)