Yoshlar ishlari agentligiga qo‘shimcha funksiyalar yuklandi

Prezident qarori bilan Yoshlar ishlari agentligi zimmasiga qo‘shimcha funksiyalar yuklandi.

“Yoshlarni xorijiy tillarga o‘qitish tizimi samaradorligini oshirish bo‘yicha qo‘shimcha chora-tadbirlar to‘g‘risida”gi qarorga ko‘ra, Yoshlar ishlari agentligi yoshlarni xorijiy tillarga o‘qitish jarayonlarini takomillashtirishi, talab yuqori bo‘lgan chet tillarini mukammal o‘zlashtirish uchun sharoitlarni kengaytirishi lozim.

Agentlik xorijiy tillarni o‘qitish faoliyati bilan shug‘ullanuvchi YATTlar, o‘zini o‘zi band qilgan shaxslar hamda nodavlat ta’lim tashkilotlari (xususiy o‘quv markazlari), ushbu yo‘nalishda faoliyat yurituvchi boshqa nodavlat notijorat tashkilotlarini rivojlantirish va qo‘llab-quvvatlash, sohadagi muammolarni muntazam ravishda tahlil qilishi va ularning yechimi bo‘yicha takliflar tayyorlashi kerak.

Shuningdek, xususiy o‘quv markazlari reytingini shakllantirish hamda reytingda yuqori o‘rinni egallaganlarni rag‘batlantirish bilan shug‘ullandi.

Yoshlar orasida kasb-hunar va xorijiy tillarni o‘rganishni targ‘ib qilish, ushbu yo‘nalishdagi ijtimoiy loyihalar, ko‘rik-tanlov va olimpiadalarni tashkil etish ham agentlikka qo‘shimcha funksiya sifatida yuklandi.

• Ma’lumot uchun, Yoshlar ishlari agentligi 2020-yil 30-iyunda tashkil etilgan.
• Agentlik yoshlar bilan bog‘liq muammolarni yechish, iqtidorli yoshlarni rag‘batlantirish bilan shug‘ullanadi. 
• 2024-yilda Yoshlar ishlari agentligi Vazirlar Mahkamasiga o‘tkazildi.