Qoraqalpog‘iston Respublikasi va Qashqadaryo viloyatida qo‘lbola usulda alkogol mahsulotlarini ishlab chiqarish bilan shug‘ullanib kelgan shaxslar ushlandi, deb xabar beradi Bosh prokuratura huzuridagi departament.
Qayd etilishicha, departamentning Qoraqalpog‘iston Respublikasi Taxiatosh tuman bo‘limi, DXX va IIV xodimlari hamkorligida tezkor tadbirlar o‘tkazilgan. Tadbirlar davomida Nukus shahri “Janabazar” MFY hududidagi xonadonda yashovchi R.B. o‘z uyida qo‘lbola usulda alkogol mahsulotlari ishlab chiqarish bilan shug‘ullanib kelib, fuqaro Z.D.ga jami 96 dona “Qaratau” nomi ostidagi aksiz markasiz alkogol mahsulotini 2,7 million so‘mga sotgan vaqtida ashyoviy dalillar bilan ushlangan.
Shuningdek, uning ko‘rsatuviga asosan Nukus shahri va To‘rtko‘l tumanida davom etgan tadbirlarda qalbaki alkogol mahsulotlari savdosi bilan shug‘ullanib kelgan B.I. va I.Q. jami 1 110 dona “Qaratau” nomli qo‘lbola alkogol mahsulotlarini o‘tkazish maqsadida olib kelgan vaqtida ashyoviy dalillar bilan ushlangan.
Shu kabi, departamentning Ko‘kdala tuman bo‘limi tomonidan IIB xodimlari bilan hamkorlikda o‘tkazilgan tezkor tadbirda fuqaro X.O. hech qanday hujjatsiz 60 dona “Shahrisabz” nomli alkogol mahsulotini fuqaro A.A.ga sotgan vaqtida ushlanib, undan jami 2 turdagi 336 dona isteʼmolga yaroqsiz va qalbaki aksiz markali alkogol mahsulotlari ashyoviy dalil sifatida olingan.
Mazkur holatlar yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) va 186-1-moddasi (etil spirti, alkogolli mahsulot va tamaki mahsulotini qonunga xilof ravishda ishlab chiqarish yoki muomalaga kiritish) bilan jinoyat ishi qo‘zg‘atilib, tergov harakatlari o‘tkazilmoqda.
Avvalroq Qoraqalpog‘iston Respublikasi va Farg‘ona viloyatida qalbaki aksiz markali alkogol mahsulotlarini muomalaga kiritilishining oldi olingani to‘g‘risida xabar berilgandi.
Izoh (0)