Toshkent shahrida 26-iyun — Xalqaro giyohvandlikka qarshi kurashish kuni munosabati bilan noqonuniy muomaladan olingan narkotik moddalarni yo‘q qilish tadbiri o‘tkazildi. Bu haqda “Daryo” muxbiri xabar berdi.
Davlat xavfsizlik xizmati tomonidan tashkil etilgan tadbirda mutasaddi idoralar xodimlari, xalqaro tashkilotlar, diplomatik korpus, jamoatchilik va OAV vakillari qatnashdi.
Tadbirda 2 tonna 158 kg giyohvandlik vositalari ishtirokchilar ko‘z o‘ngida, maxsus pechda yoqib yuborildi.
Respublika huquqni muhofaza qilish idoralari tomonidan 2023-yilda giyohvandlik vositalarining noqonuniy muomalasi bilan bog‘liq 10 039 ta (2022-yil mos davridagidan 15,5 foiz ko‘p) holat aniqlangan. Shundan 10 011 tasida jinoiy ish qo‘zg‘atilgan, 28 tasida maʼmuriy choralar qo‘llanilgan.
Jinoiy ishlarning 3 122 tasi narkotik moddalarni o‘tkazish, 399 tasi kontrabanda, 1 705 tasi tarkibida giyohvandlik vositalari mavjud bo‘lgan o‘simliklarini yetishtirish bilan bog‘liq.
Respublikada giyohvandlik vositalarining noqonuniy muomalasidan 2023-yilda jami 10,4 tonna miqdordagi narkotik moddalar musodara qilingan. Shundan qariyb 82,7 foizi ko‘knor bo‘lgan.
Maʼlumotlarga ko‘ra, O‘zbekistonga afg‘on narkotiklari asosan, Tojikiston va Qirg‘iziston orqali janubiy–sharqdan – Samarqand va Sirdaryo viloyatlariga, shimoliy–sharqdan – Farg‘ona vodiysi viloyatlari, Toshkent viloyati hamda to‘g‘ridan–to‘g‘ri Afg‘onistondan Amudaryo daryosi orqali Surxondaryo viloyatiga olib kirilishi kuzatilmoqda.
2023-yil davomida O‘zbekiston Respublikasi hududida giyohvandlik vositalari, psixotrop moddalar va prekursorlarning noqonuniy muomalasi bilan bog‘liq jinoyatlar sodir etganligi uchun 94 ta xolatlar bo‘yicha xorijiy davlatlarning 101 nafar fuqarosi ushlangan.
Tadbirda narkojinoyat sodir etganlik holati bilan sudlanganlar orasida yoshlar ulushi tobora ortib borayotgani aytildi. Masalan, 2018-yilda jami narkojinoyatlarning 19,1 foizi (3691 tadan 705 tasi) yoshlar tomonidan sodir etilgan. Bu raqamlar 2019-yilda 22,6 foizga (3472 tadan 784 ta), 2020-yilda 24,8 foizga (3977 tadan 987 ta) chiqqan. 2021-yilda narkojinoyatlar bo‘yicha ko‘rib chiqilgan 4254 ta jinoyat ishidan 920 tasi yoshlarga (21,6 foiz) tegishli bo‘lgan.
2022-yilda bu ko‘rsatkich 25,3 foizni (4254 tadan 920 ta) tashkil etgan. 2023-yilga kelib raqamlar yanada o‘sgan va 28,1 foizga (6264 tadan 1758 ta) yetgan. Xususan, mazkur yo‘nalishda qo‘zg‘atilgan eng ko‘p jinoyat ishlari Toshkent shahrida qayd etilgan va 55,5 foizni (1309 tadan 727 ta) tashkil etgan. Bu degani shaharda narkotik moddalar bilan bog‘liq jinoyatlarning har ikkinchisi yoshlar tomonidan sodir etilmoqda.
Maʼlumot uchun, O‘zbekiston 1995-yil fevralda BMT giyohvandlik vositalari va psixotrop moddalar noqonuniy muomalasiga qarshi kurash bo‘yicha konvensiyalariga qo‘shilgan. 1999-yil 19-avgust kuni mamlakatda “Giyohvandlik vositalari va psixotrop moddalar to‘g‘risida”gi qonun qabul qilingan. 2024-yilda giyohvandlik va narkojinoyatlarga qarshi kurashish bo‘yicha 2024–2028-yillarga mo‘ljallangan “Milliy strategiya” ishlab chiqildi.
Izoh (0)