Samarqand viloyati Jomboy tumanidan o‘tgan M-39 avtomobil yo‘lida uchta transport vositasi ishtirokida YTH sodir bo‘ldi. Bu haqda viloyat IIB axborot xizmati xabar berdi.
Qayd etilishicha, 26-iyun kuni tungi soat 22:30 lar atrofida Jomboy tumani “Beshbola” MFY hududidan o‘tuvchi Olmaota—Toshkent—Termiz avtomobil yo‘lida Nexia rusumli transport vositasi qayrilib olayotgan vaqtida o‘zi bilan bir yo‘nalishda harakatlanib kelayotgan MAN rusumli yuk transport vositasi orqasidan kelib urib yuborgan.
Oqibatda Nexia rusumli avtomashina qarama-qarshi yo‘nalishda harakatlanib kelayotgan “GAZ-60” rusumli transport vositasining oldi qismi bilan to‘qnashgan, undan so‘ng MAN yuk transport vositasi yo‘lni ikkiga ajratib turuvchi beton to‘siqqa kelib urilgan.
Shundan so‘ng yuk transport vositasining salon qismida yong‘in sodir bo‘lgan. Yong‘in zudlik bilan FVB tomonidan bartaraf qilingan. Hodisa oqibatida og‘ir tan jarohati olgan va halok bo‘lganlar yo‘q.
Hozirda holat yuzasidan Jomboy tuman IIB JXX YHXB tomonidan dastlabki surishtiruv ishlari olib borilmoqda.
Avvalroq Samarqandda “KamAZ” ayol va uning ikki farzandini urib yuborgani, Sirdaryoda Nexia-1 yuk mashinasiga kelib urilishi oqibatida ikki kishi jarohatlangani, Toshkentda 2024-yilning besh oyida YTH oqibatida 29 kishi halok bo‘lgani to‘g‘risida xabar berilgandi.
Izoh (0)