Ming marta tuzatilishi so‘ralgan xavfli yo‘llar va bolalar o‘limi — Senat yo‘llardagi xavfsizlikni muhokama qildi

Yo‘l-transport hodisalarining 57 foizi yo‘l infratuzilmasidagi kamchiliklar oqibatida sodir etilgan. Bu haqda 25-iyun kuni Oliy Majlis Senatida avtomobil yo‘llarida inson xavfsizligini ishonchli ta’minlash va o‘lim holatlarini keskin kamaytirish bo‘yicha amalga oshirilayotgan ishlar holati tahliliga bag‘ishlangan anjumanda ma’lum qilindi.

Aytilishicha, yo‘l-transport hodisalarining 43 foizi haydovchi tomonidan yo‘l harakati qoidalariga rioya qilmaslik oqibatida sodir etilgan bo‘lsa, 53,7 foizi piyoda va velosipedchilar bilan bog‘liq holatlar hissasiga to‘g‘ri kelmoqda.

Bolalar va o‘lim

Senatning ma’lum qilishicha, umumiy o‘rta ta’lim maktablarining 9 ming 548 tasi transport qatnovi ko‘p hududlarda joylashgan va aksariyat maktablar oldida piyodalar uchun yo‘laklar mavjud emas, tegishli svetoforlar o‘rnatilmagan.

Oqibatda joriy yilning 5 oyi davomida jami 359 nafar o‘quvchi bilan bog‘liq yo‘l-transport hodisasi sodir etilgan va 65 nafar o‘quvchi halok bo‘lgan, 294 nafar o‘quvchi esa turli darajada tan jarohatlari olgan.

Sodir bo‘lgan umumiy yo‘l-transport hodisalarining soni har 100 ming aholiga 7,2 tani tashkil etgan bir paytda ushbu salbiy ko‘rsatkich:

• Toshkent shahrida 12,8 tani,
• Toshkent viloyatida 12,2 taga,
• Namangan viloyatida 9,1 taga,
• Farg‘ona viloyatida 8,4 taga yetgan.

O‘lim bilan bog‘liq yo‘l-transport hodisalarining salmog‘i:

• Samarqandda 80 ta,
• Toshkentda 80 ta,
• Farg‘onada 69 ta,
• Qashqadaryoda 53 ta,
• Surxondaryoda 53 ta bo‘lib, hamon yuqoriligicha qolmoqda.

Ma’lumot uchun, 2023-yilda bolalar bilan bog‘liq 1 ming 794 ta yo‘l-transport hodisasi sodir etilib, ularda 1 ming 568 nafar bola jarohatlangan va 263 nafar bola halok bo‘lgan.

16 milliondan ortiq qoidabuzarlik

2023-yil va 2024-yilning 5 oy davomida Davlat yo‘l harakati xavfsizligi xizmatining mas’ul xodimlari tomonidan yo‘l infratuzilmasi bilan bog‘liq qariyb 11 ming kamchiliklar aniqlangan bo‘lib, ularni bartaraf etish yuzasidan avtomobil yo‘llari egalariga jami 5,5 mingta yozma ko‘rsatma va taqdimnomalar kiritilgan.

Avtomobil yo‘llarida yo‘lovchilar xavfsizligini ta’minlash yuzasidan ta’sirchan nazorat to‘liq va samarali o‘rnatilmagani sabab 2023-yilda jami 16 milliondan ortiq qoidabuzarlik qayd etilgan.

Sodir etilgan 9 ming 839 ta yo‘l-transport hodisasi oqibatida 9 ming 209 nafar fuqaro jarohatlangan va 2 ming 282 nafar fuqaro halok bo‘lgan.