Йўл-транспорт ҳодисаларининг 57 фоизи йўл инфратузилмасидаги камчиликлар оқибатида содир этилган. Бу ҳақда 25 июнь куни Олий Мажлис Сенатида автомобиль йўлларида инсон хавфсизлигини ишончли таъминлаш ва ўлим ҳолатларини кескин камайтириш бўйича амалга оширилаётган ишлар ҳолати таҳлилига бағишланган анжуманда маълум қилинди.
Айтилишича, йўл-транспорт ҳодисаларининг 43 фоизи ҳайдовчи томонидан йўл ҳаракати қоидаларига риоя қилмаслик оқибатида содир этилган бўлса, 53,7 фоизи пиёда ва велосипедчилар билан боғлиқ ҳолатлар ҳиссасига тўғри келмоқда.
Болалар ва ўлим
Сенатнинг маълум қилишича, умумий ўрта таълим мактабларининг 9 минг 548 таси транспорт қатнови кўп ҳудудларда жойлашган ва аксарият мактаблар олдида пиёдалар учун йўлаклар мавжуд эмас, тегишли светофорлар ўрнатилмаган.
Оқибатда жорий йилнинг 5 ойи давомида жами 359 нафар ўқувчи билан боғлиқ йўл-транспорт ҳодисаси содир этилган ва 65 нафар ўқувчи ҳалок бўлган, 294 нафар ўқувчи эса турли даражада тан жароҳатлари олган.
Содир бўлган умумий йўл-транспорт ҳодисаларининг сони ҳар 100 минг аҳолига 7,2 тани ташкил этган бир пайтда ушбу салбий кўрсаткич:
- Тошкент шаҳрида 12,8 тани,
- Тошкент вилоятида 12,2 тага,
- Наманган вилоятида 9,1 тага,
- Фарғона вилоятида 8,4 тага етган.
Ўлим билан боғлиқ йўл-транспорт ҳодисаларининг салмоғи:
- Самарқандда 80 та,
- Тошкентда 80 та,
- Фарғонада 69 та,
- Қашқадарёда 53 та,
- Сурхондарёда 53 та бўлиб, ҳамон юқорилигича қолмоқда.
Маълумот учун, 2023 йилда болалар билан боғлиқ 1 минг 794 та йўл-транспорт ҳодисаси содир этилиб, уларда 1 минг 568 нафар бола жароҳатланган ва 263 нафар бола ҳалок бўлган.
16 миллиондан ортиқ қоидабузарлик
2023 йил ва 2024 йилнинг 5 ой давомида Давлат йўл ҳаракати хавфсизлиги хизматининг масъул ходимлари томонидан йўл инфратузилмаси билан боғлиқ қарийб 11 минг камчиликлар аниқланган бўлиб, уларни бартараф этиш юзасидан автомобиль йўллари эгаларига жами 5,5 мингта ёзма кўрсатма ва тақдимномалар киритилган.
Автомобиль йўлларида йўловчилар хавфсизлигини таъминлаш юзасидан таъсирчан назорат тўлиқ ва самарали ўрнатилмагани сабаб 2023 йилда жами 16 миллиондан ортиқ қоидабузарлик қайд этилган.
Содир этилган 9 минг 839 та йўл-транспорт ҳодисаси оқибатида 9 минг 209 нафар фуқаро жароҳатланган ва 2 минг 282 нафар фуқаро ҳалок бўлган.
Изоҳ (0)