Sirdaryoda bog‘cha rekonstruksiyasi uchun ajratilgan imtiyozli kreditning bir qismi talon-toroj qilindi

Samarqand va Sirdaryoda imtiyozli kreditni talon-toroj qilish holatlarni aniqlandi.

Bosh prokuratura huzuridagi Departamentning Samarqand viloyat boshqarmasi tomonidan o‘tkazilgan tergovga qadar tekshiruvda Oqdaryo tumanida faoliyat yurituvchi “M.B.” MCHJ rahbari O.Sh. hududiy tijorat banki filialidan ajratilgan 1 milliard so‘m imtiyozli kredit evaziga xarid qilingan maishiy texnika vositalari va yumshoq mebellarni naqd pulga sotib yuborib, 850 million so‘mni o‘zlashtirish yo‘li bilan talon-toroj qilgani aniqlangan.

Shu kabi, Departamentning Boyovut tuman bo‘limi tomonidan o‘tkazilgan tergovga qadar tekshirishda “B-M.” MCHJ mas’ul shaxslari va boshqalar maktabgacha ta’lim muassasasini rekonstruksiya qilish uchun tijorat banki filialidan ajratilgan imtiyozli kredit mablag‘ining 549,6 million so‘mini o‘zlashtirish yo‘li bilan talon-toroj qilgani aniqlangan.

Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishlari qo‘zg‘atilib, tergov harakatlari o‘tkazilmoqda.