DXX xodimlari tomonidan prokuratura organlari bilan hamkorlikda o‘tkazilgan tekshiruv tadbirlarida Toshkent viloyatining Ohangaron tumanida kredit mablag‘larini talon-toroj qilish holati aniqlandi.
Hukumat qaroriga asosan, 2020-yili Ohangaron tumanidagi tijorat banklaridan biri hamda sut mahsulotlari yetishtirish va naslli mollarni ko‘paytirish bilan shug‘ullanuvchi “TQD” fermer xo‘jaligi o‘rtasida tuzilgan shartnomaga asosan 7 yil muddatga 2 yillik imtiyozli davr bilan yillik 18 foiz ustama to‘lash, shundan 3 foizini Tadbirkorlik faoliyatini rivojlantirishni qo‘llab-quvvatlash davlat jamg‘armasi hisobidan qoplab berish sharti bilan 5,5 mlrd so‘m ajratilgan.
Mazkur mablag‘ hisobiga Avstriyadan 194 bosh naslli, yirik shoxli chorva mollari olib kelinishida fermer xo‘jalik 843,4 mln so‘mlik soliq va bojxona to‘lovlaridan ozod qilingan. Shuningdek, xorijdan keltirilgan chorva mollari uchun 278 mln so‘mlik subsidiya mablag‘i ajratilgan.
Ammo fermer xo‘jalik masʼullari bankka taqdim qilingan biznes rejada ko‘rsatilgan sut mahsulotlari yetishtirish va naslli mollarni ko‘paytirish bilan amalda shug‘ullanmasgan. Masʼullar nasldor qoramolni kamida 2 avlod olguncha saqlamasdan 98 bosh naslli chorva mollarini naqd pulga sotib yuborib, 2 mlrd 833,3 mln so‘mlik kredit mablag‘larini talon-toroj qilgan.
Shuningdek, ajratilgan kredit mablag‘lari maqsadli sarflanishi yuzasidan bank mansabdor shaxslari tomonidan monitoring ishlari kerakli darajada olib borilmagan.
Hozirda holat yuzasidan fermer xo‘jalik mansabdor shaxslariga nisbatan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) 3-qismi “a” bandi va 192-11–moddasi (nodavlat tijorat tashkilotida yoki boshqa nodavlat tashkilotida mansabdor shaxslar tomonidan o‘z vakolatlarini suiisteʼmol qilish) 2-qismi “a” bandi bilan, bank mansabdor shaxslariga nisbatan Jinoyat kodeksining 207-moddasi (mansabga sovuqqonlik bilan qarash) 1-qismi bilan jinoyat ishi qo‘zg‘atilib, tergov harakatlari olib borilmoqda.
Izoh (0)