Jizzax, Andijon, Qashqadaryo va Farg‘ona viloyatlarida imtiyozli kredit mablag‘larini talon-toroj qilgan shaxslar aniqlandi. Bu haqda Bosh prokuratura huzuridagi departament xabar berdi.
Qayd etilishicha, departamentning Jizzax viloyat boshqarmasi tomonidan tergovga qadar tekshiruv o‘tkazilgan. Tekshiruvda “E.B.” fermer xo‘jaligi rahbari M.Y. va boshqalar hududiy tijorat bankidan ajratilgan 110 ming dollar miqdoridagi imtiyozli kredit mablag‘lari evaziga sotib olingan jami 40 bosh naslli chorva mollarini boshqa shaxslarga sotib yuborib, ushbu mablag‘larni talon-toroj qilgani aniqlangan.
Departamentning Xo‘jaobod tuman bo‘limi tomonidan o‘tkazilgan tergovga qadar tekshiruvda YTT F.Y. va boshqalar hududiy tijorat bankidan trikotoj ishlab chiqarish maqsadida ajratilgan kredit mablag‘lari evaziga xarid qilingan jihozlarni naqd pulga sotib yuborib, trikotaj ishlab chiqarish faoliyatini yo‘lga qo‘ymasdan, 434,8 million so‘m kredit mablag‘ini o‘zlashtirish yo‘li bilan talon-toroj qilgani ma’lum bo‘lgan.
Shu kabi, departamentning Qashqadaryo viloyat boshqarmasi tomonidan o‘tkazilgan tergovga qadar tekshiruvda “A.K.” va “A.T.” MCHJ masʼul shaxslari hududiy tijorat bankidan 9 nafar fuqaroga tadbirkorlikni rivojlantirish maqsadida ajratilgan imtiyozli kredit evaziga taʼminotchi korxona sifatida texnika mahsulotlarini yetkazib bermasdan, rasmiy hujjatlarga soxta maʼlumotlar kiritish orqali jami 323 million so‘m kredit mablag‘ini o‘zlashtirish yo‘li bilan talon-toroj qilgani aniqlangan.
Departamentning Furqat tuman bo‘limi tomonidan o‘tkazilgan tergovga qadar tekshiruvda esa Furqat bank xizmatlari markazi sobiq rahbari D.M. va boshqalar 5 nafar fuqaro nomidan ularning xabardorligisiz “F.B.” va “T.I.” MCHJ hamda boshqa tadbirkorlik subyektlari bilan soxta shartnomalar tuzish orqali 132,3 million so‘m imtiyozli kredit ajratilishiga erishib, ushbu mablag‘larni talon-toroj qilgani aniqlangan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Surxondaryoda xususiy bog‘cha qurish uchun ajratilgan 356 mln so‘m kredit mablag‘lari talon-toroj qilingani to‘g‘risida xabar berilgandi. Shuningdek, Toshkent viloyatida fermer xo‘jaligi 3,1 mlrd so‘m imtiyozli kredit mablag‘ini o‘zlashtirgani ma’lum bo‘lgan edi.
Izoh (0)