Tayvan Mudofaa vazirligi 22-iyun kuni orol hududiga Xitoyning 41 ta harbiy samolyoti yaqinlashganini xabar bergan. Bu haqda vazirlik bayonotiga asoslanib, Insider Paper manbasi maʼlum qilgan.
Tayvan Mudofaa vazirligi so‘nggi 24 soatda orol atrofida 41 ta Xitoy samolyoti harakatlanganini xabar bergan. Shuningdek, yettida yirik harbiy kema ham qirg‘oqqa yaqinlashgan.
“Samolyotlardan 32 tasi Tayvan bo‘g‘ozining o‘rta chizig‘ini kesib o‘tdi. Tayvan mudofaa kuchlari ularga tegishli javob qaytardi”, — deyilgan oroldagi hukumat xabarida.
Manbada aytilishicha, Xitoy kemalari 110 kilometrlik dengiz nazorat chizig‘idan o‘tib, Tayvan suvlariga kirgan. Kemalar bir yo‘nalishda va tartibli harakat qilib, orolga yaqinlashgan.
Tayvan hukumati va unga hamkor G‘arb mamlakatlari Pekinning ulkan harbiy kontingenti orolga yaqinlashishidan xavotir bildirgan. Taypeydagi rahbariyat havo kuchlarini shay holatga keltirgan.
Joriy yilning 25-may kuni ham Xitoy katta harbiy havo va dengiz kuchlarini Tayvan bo‘g‘oziga olib kirgan edi. O‘shanda kontingent 62 ta samolyot va 10 dan ortiq harbiy kemalardan iborat bo‘lgani aytilgan. Dengizda qisqa mashg‘ulotlardan so‘ng Pekin harbiy qismlarini quruqlikka qaytargan.
Xitoy rasmiylari Tayvanga yangi harbiy tahdid haqidagi savollarga javob qaytarmagan. Ikki tomon o‘rtasida havoda va dengizda to‘qnashuv bo‘lgani haqida ham maʼlumot mavjud emas.
Izoh (0)