Тайван Мудофаа вазирлиги 22 июнь куни орол ҳудудига Хитойнинг 41 та ҳарбий самолёти яқинлашганини хабар берган. Бу ҳақда вазирлик баёнотига асосланиб, Insider Paper манбаси маълум қилган.
Тайван Мудофаа вазирлиги сўнгги 24 соатда орол атрофида 41 та Хитой самолёти ҳаракатланганини хабар берган. Шунингдек, еттида йирик ҳарбий кема ҳам қирғоққа яқинлашган.
“Самолётлардан 32 таси Тайван бўғозининг ўрта чизиғини кесиб ўтди. Тайван мудофаа кучлари уларга тегишли жавоб қайтарди”, — дейилган оролдаги ҳукумат хабарида.
Манбада айтилишича, Хитой кемалари 110 километрлик денгиз назорат чизиғидан ўтиб, Тайван сувларига кирган. Кемалар бир йўналишда ва тартибли ҳаракат қилиб, оролга яқинлашган.
Тайван ҳукумати ва унга ҳамкор Ғарб мамлакатлари Пекиннинг улкан ҳарбий контингенти оролга яқинлашишидан хавотир билдирган. Тайпейдаги раҳбарият ҳаво кучларини шай ҳолатга келтирган.
Жорий йилнинг 25 май куни ҳам Хитой катта ҳарбий ҳаво ва денгиз кучларини Тайван бўғозига олиб кирган эди. Ўшанда контингент 62 та самолёт ва 10 дан ортиқ ҳарбий кемалардан иборат бўлгани айтилган. Денгизда қисқа машғулотлардан сўнг Пекин ҳарбий қисмларини қуруқликка қайтарган.
Хитой расмийлари Тайванга янги ҳарбий таҳдид ҳақидаги саволларга жавоб қайтармаган. Икки томон ўртасида ҳавода ва денгизда тўқнашув бўлгани ҳақида ҳам маълумот мавжуд эмас.
Изоҳ (0)