Pokiston shimoli-g‘arbida 21-iyun kuni yuz bergan portlash oqibatida besh nafar harbiy halok bo‘ldi. Bu haqda Arab News nashri xabar berdi.
Manbada aytilishicha, portlash Xayber-Paxtunxva viloyatida yuz bergan. Kurram tumanida xavfsizlik kuchlari xodimlarini olib ketayotgan mashina nomaʼlum quroldan o‘qqa tutilgan.
Hujum oqibatida mashina portlab ketgan. Uning ichida bo‘lgan 5 nafar harbiy kuchli darajada kuyish belgilari bilan halok bo‘lgan.
Pokiston armiyasi ushbu hududda terrorchilarni yo‘q qilish uchun maxsus operatsiyasi o‘tkazayotgani aytilgan. Jinoyatchilar tez fursatda topilishi va javobgarlikka tortilishi maʼlum qilingan.
“Pokiston xavfsizlik kuchlari terrorizm tahdidini yo‘q qilishga qatʼiy qaror qildi. Jasur askarlarimizning bunday qurbon bo‘lishi esa bizning qatʼiyatimizni yanada mustahkamlaydi”, — deyilgan Pokiston qurolli kuchlari qanoti matbuot bo‘limi eʼlon qilgan bayonotda.
Mamlakat prezident Osif Ali Zardoriy portlashni keskin qoralagan. Prezident shahidlarning burch va vatanparvarlik tuyg‘usini hamda mamlakatdan jangarilarni yo‘q qilishda xavfsizlik kuchlarining rolini yuqori baholagan. Qurbonlarning oila aʼzolariga hamdardligini izhor qilgan.
Hujum uchun javobgarlikni hech bir guruh o‘z bo‘yniga olmagan. Shunga qaramay Islomobodning bir qator rasmiylari terakt tashkilotchisi sifatida “Tahriki Tolibon”ni ayblagan.
So‘nggi bir necha oyda Pokistonning Afg‘oniston bilan chegaradosh Xayber-Paxtunxva viloyatida ko‘plab teraktlar kuzatildi. Pokiston bu teraktlarni Afg‘oniston sharqidan yashirincha kirib kelgan jangarilar uyushtirganini daʼvo qilgan. Joriy yilning 11-iyun kuni butun Xayber-Paxtunxva viloyatida terrorizmga qarshi ommaviy kurash maxsus operatsiyalari boshlangan.
Izoh (0)