O‘zbekistonda 2024-yil may oyida jami 32 029 dona avtomobil ishlab chiqarilgan. Bu o‘tgan yilning mayiga nisbatan 6 219 dona kamroq.
Iqtisodchi Otabek Bakirovning yozishicha, avtosanoat may oyida ishlab chiqarishni o‘tgan yilning shu davriga solishtirganda va aprelga nisbatan ayrim ommabop modellarda sezilarli darajada pasaytirgan.
Ishlab chiqarishning qisqarishi, xususan, “konveyerdan olindi” deyilgan Lacetti (959 dona ishlab chiqarilgan, aprelga nisbatan 1 184 donaga kam) va Tracker (2 102 dona, 3 050 donaga kam) hisobiga ro‘y bergan. O‘shanda Lacetti uchun butlovchi qismlar ishlab chiqaruvchi korxonalarning ishlab chiqarish quvvatlari yangi modellarga yo‘naltirilishi aytilgandi.
Ayni vaqtda Cobalt ishlab chiqarish 15 838 donagacha yetgan (aprelga nisbatan 2 490 donaga ko‘p).
2024-yilning 5 oyida esa jami 57 542 ta Cobalt ishlab chiqarilgan. Statistika agentligi ma’lumotiga ko‘ra, bu o‘tgan yilning yanvar—may oylariga nisbatan 46,6 foizga ko‘p.
Cobalt’dan so‘ng besh oy davomida eng ko‘p ishlab chiqarilgan yengil avtomobillar quyidagicha:
- Damas — 31 239 dona;
- Tracker — 19 279 dona;
- Onix — 14 905 dona;
- Lacetti-Gentra — 11 913 dona;
- Kia — 7 433 dona;
- Chery — 4 000 dona;
- Haval — 230 dona;
- Exeed — 93 dona.
Shuningdek, 10 198 dona maxsus yengil avtomobillar ishlab chiqarilgan.
Izoh (0)