“Ishlab chiqarish davom etayotgan Nexia-3 qay yo‘l bilan, kimlarga va qanaqa shartlarda sotilayotgani juda qiziq” — Otabek Bakirov

Nexia-3 avtomobilini ishlab chiqarish mart oyida ham davom etgan. Biroq mazkur rusumdagi mashinaga shartnoma tuzish yarim yil ilgari to‘xtatilgan.

UzAuto Motors 2022-yil yakunida Spark va Nexia ishlab chiqarish to‘xtatilishini, ularning o‘rnini Chevrolet Tracker hamda Onix egallashini xabar qilgandi.

Statistika agentligi maʼlumotlariga ko‘ra, joriy yilning yanvar-mart oylarida 1 ming 843 dona Nexia-3 avtomobili ishlab chiqarilgan.

Iqtisodchi Otabek Bakirov Telegram’dagi kanalida kompaniya tomonidan ishlab chiqarilishi to‘xtamayotgan Nexia-3 avtomobillari qay yo‘l bilan, kimlarga va qanaqa shartlarda sotilayotganiga qiziqdi.

“Mart oyida 1376 dona yoki fevralga nisbatan deyarli 3 barobar ko‘p Nexia-3 ishlab chiqarilgan. Bu ko‘rsatkich bo‘yicha Nexia-3 konveyerga endigina qo‘yilgan qimmatbaho va boylarning sevimlisi Onix (447 dona) va Tracker‘ni (573 dona) ham ortda qoldirgan.

Onix va Tracker uchun kontraktatsiya qilish mumkin bo‘lsa-da, qora xalq imkoniyatidagi Nexia-3 uchun kontraktatsiya yopilganiga 7 oy bo‘lyapti. Ishlab chiqarish davom etayotgan Nexia-3 qay yo‘l bilan, kimlarga va qanaqa shartlarda sotilayotgan juda qiziq. Lekin sotuvlarning shaffofligi masalasiga allaqachon qo‘l siltab qo‘yilgan ko‘rinadi.

Shunchaki maʼlumot uchun, preyskurant narxi 10 ming dollar atrofida bo‘lgan Nexia-3 bozorda eng kamida 12,5 ming dollardan pullanmoqda”, – deb yozgan iqtisodchi. 

Otabek Bakirov bundan bir oy avval ham fevral oyida ishlab chiqarilgan avtomobillar kimlarga, qay tarzda va qaysi narxlarda sotilgani nomaʼlumligiga to‘xtalgandi.

“Ishlab chiqarilishi to‘xtatilishi 7 oyning narida rasman eʼlon qilingan va oxirgi zaxiralar deya sentyabrgacha kontraktatsiya darchasi ochilgan Nexia-3 avtomobili ishlab chiqarilishi fevral oyida qayta tiklangan. Rasmiy statistikaga ishonilsa, fevralda 467 dona Nexia-3 konveyerdan chiqqan. Rasman bot va ilova orqali Nexia-3 bo‘yicha kontraktatsiya to‘xtaganiga 6 oydan oshgan. Fevralda ishlab chiqarilgan avtomobillar kimga va qay tarzda va qaysi narxlarda sotilgani nomaʼlum. Balki, avval ham ko‘p qo‘llanilgani singari darcha mexanizmi orqali “ko‘rpa ostida, o‘raga sichqon tushdi guldur gup” tarzida egalarini topgan bo‘lishi mumkin. Darvoqe, hukumat istasa, uning erkatoy monopolisti istalgan miqdordagi istalgan kamyob avtomobilni “shessekundda” topib beradi”, – deya fikr bildirgan tahlilchi.

Shu bilan birga, mutaxassis tomonidan O‘zbekistonda qo‘shilgan qiymat solig‘i 15 foizdan 12 foizga pasaysa-da, UzAuto Motors avtomobillar narxlarini tushirmaganiga eʼtibor qaratilgan.