UzAutoMotors 8-may kuni soat 10:00 da 4 500 dona Lacetti avtomobiliga shartnoma ochilishini eʼlon qilgandi. Kompaniya matbuot xizmatiga ko‘ra, 15 daqiqa ichida 4,4 mingta mashinaga shartnoma tuzilgan.
UzAutoMotors 8-may kuni sotuvga chiqadigan barcha avtomobillarni shu zahoti olib ketish imkoniyati bilan shartnoma tuzish mumkinligini, shuningdek, Damas va Labo avtomobillari uchun ham shartnoma tuzilishini ma’lum qilgan edi.
8-may 10:15 holatiga ko‘ra esa 4 400 dona Chevrolet Lacetti avtomobili uchun shartnoma tuzilgani ma’lum bo‘ldi. Oradan yana bir necha daqiqa o‘tib, Chevrolet Lacetti avtomobillari uchun tuzilgan shartnomalar soni 4 500 taga yetdi.
Tuzilgan shartnomalarning 99,9 foizi One ID tizimida ro‘yxatdan o‘tgan va 1 ta dan ko‘p bo‘lmagan avtomobil uchun shartnoma tuzgan jismoniy shaxslarga to‘g‘ri keladi, — deyiladi kompaniya xabarida.
Eslatib o‘tamiz, UzAutoMotors 2023-yil 4-avgust kuni ishlab chiqarish liniyalarida amalga oshirilgan modernizatsiya ishlari, shuningdek, zavod faoliyati samaradorligining oshishi hisobiga qo‘shimcha 50 000 dona avtomobil ishlab chiqarish imkoniyati yaratilganini ma’lum qilgan edi. Ertasiga, 5-avgustda esa shartnoma berish to‘xtatilgani ma’lum qilingandi.
Shuningdek, 18-sentabr kuni UzAutoMotors rasmiy saytida ko‘rsatilgan komplektatsiya va ranglardagi Chevrolet Cobalt, Lacetti, Damas va Labo avtomobillari uchun kontraktatsiya ochildi va ko‘p o‘tmay Cobalt va Lacetti uchun shartnoma berish to‘xtatildi. Dekabr oyida esa UzAutoMotors Chevrolet Lacetti (Gentra) ishlab chiqarishni to‘xtatishi ma’lum bo‘lgan edi. O‘shanda mazkur avtomobil uchun butlovchi qismlar ishlab chiqaruvchi korxonalarning ishlab chiqarish quvvatlari yangi modellarga yo‘naltirilishi aytilgandi.
Izoh (0)