Isroil bosh vaziri Binyamin Netanyaxu Jo Bayden maʼmuriyatini tanqid qilishi ortidan Vashington Isroil rahbariyati bilan o‘tkazilishi belgilangan strategik uchrashuvni bekor qildi. Bu haqda Isroil nashrlari tarqatgan xabarga asoslanib, Anadolu maʼlum qildi.
Manbada aytilishicha, Isroil bosh vaziri AQSH va uni idora qiluvchi Bayden maʼmuriyatini qurol yetkazib berishni kechiktirishda ayblagan. Buning oqibatida AQSH rasmiylari Tel-Aviv vakillari bilan 20-iyunga belgilangan uchrashuvni bekor qilgan.
“So‘nggi bir necha oy ichida AQSH maʼmuriyati Isroilga qurol va o‘q-dorilarni bermay qo‘yganini tasavvur qilish ham g‘azablanarli”, — degan Netanyaxu seshanba kuni X tarmog‘ida eʼlon qilgan xabarida.
Manbada aytilishicha, 20-iyunga belgilangan uchrashuvda Isroil va AQSH Eron yadro dasturi haqida muhokama olib borishi kerak bo‘lgan. Ushbu uchrashuv Vashingtonda o‘tkazilishi rejalashtirilgan.
“Uchrashuv payshanba kuni Vashingtonda bo‘lib o‘tishi kerak edi va u birinchi navbatda Eron yadro dasturidagi taraqqiyotga bag‘ishlanishi kerak bo‘lgan”, — deb yozgan Isroilning Haaretz gazetasi.
Isroil hukumati AQSH bilan uchrashuvda ishtirok etish uchun strategik masalalar bo‘yicha vazir Ron Dermer boshchiligidagi delegatsiya tayinlagan. AQSH tomonidan esa milliy xavfsizlik bo‘yicha maslahatchi Jeyk Sallivan qatnashishi kerak bo‘lgan.
Oldinroq, prezident Bayden yangi qurollarning yuborilishi Isroilning mudofaa maqsadlariga to‘g‘ri kelmasligini bildirgan edi. Chunki Tel-Aviv so‘ragan qurollarning aksariyati hujum qurollari bo‘lgan.
Isroil Mudofaa vazirligi bayonotiga ko‘ra, iyun oyi boshida Isroil AQShda ishlab chiqarilgan 25 ta F-35 qiruvchi samolyotlarini umumiy qiymati 3 milliard dollarga sotib olish bo‘yicha kelishuv imzolagan. Ammo bu samolyotlar hali yetkazib berilmagan.
Aprel oyida ham Bayden ma‘muriyati Isroilga 26,4 milliard dollarlik yordam paketi ajratish to‘g‘risidagi qarorni imzolagan. Shundan 14 milliard dollar harbiy texnikalar sotib olib berish uchun sarflanishi kerak edi.
Izoh (0)