Livanning “Hizbulloh” guruhi rahbari Hasan Nasrulloh to‘laqonli urush bo‘lsa, Isroilda “hech qanday joy” qolmasligidan ogohlantirdi. Bu haqda Al Arabiya xabar berdi.
Nasrulloh Isroilga o‘zining aeroport va bazalarini ochish ehtimoliga qarshi Kiprga ham tahdid qildi. Kipr ham Isroil, ham Livan bilan yaxshi munosabatlarga ega va ikkala davlatning qirg‘oqlariga yaqin joylashgan.
“Livanni nishonga olish uchun Isroilga aeroport va bazalarini ochib berish Kipr hukumati urushning bir qismi ekanini anglatadi. Dushman biz eng yomon vaziyatga ham tayyorligimizni yaxshi biladi...raketalarimiz yetib bormaydigan bo‘sh joy qolmaydi.
Isroil bizni quruqlikda, dengizda va havodan (hujum qilishimizni) kutishi kerak. Dushman haqiqatan ham qarshilik Isroil shimolidagi Galileyaga (Livan bilan chegaradosh hudud) kirib kelishidan qo‘rqadi. Livanni urushga majburlash kontekstida bu amalga oshishi mumkin”, — dedi “Hizbulloh” yetakchisi.
Nasrullohning bayonoti Isroil rasmiylari “Hizbulloh”ga qarshi keng ko‘lamli urushga tayyorligini tasdiqlaganidan so‘ng e’lon qilindi.
“Dushman nima desa ham, vositachilarning tahdid va ogohlantirishlari ham, Isroil ommaviy axborot vositalarida Livandagi urush haqida aytilgan gaplar ham bizni cho‘chitmaydi”, — dedi “Hizbulloh” rahbari.
U Isroil “qo‘rqishi” kerak bo‘lgan tomon ekani, “Hizbulloh” Isroil bilan qarshilik boshlanganidan beri, ya’ni oktyabr oyidan beri qurollarining faqat “bir qismini” qo‘llagani haqida ogohlantirdi.
“Biz yangi qurollarga ega bo‘ldik. Ayrim qurollarimizni takomillashtirdik, boshqalarini kelgusi kunlarga saqlab qolamiz. Yillar oldin 100 ming jangchi haqida gapirgan bo‘lsak, hozirda bu raqamdan ancha oshib ketdik”, — dedi u.
Isroil-Livan to‘qnashuvi Livanda kamida 478 kishining hayotiga zomin bo‘ldi, ularning aksariyati jangchilar, shu jumladan 93 nafari tinch aholi vakillaridir. Isroil rasmiylariga ko‘ra, mamlakat shimolida kamida 15 askar va 11 tinch aholi halok bo‘lgan.
Izoh (0)