Isroil bosh vaziri Binyamin Netanyaxu favqulodda harbiy kabinetni tarqatib yubordi. U tegishli qarorni Isroil muxolifati yetakchilaridan biri Benni Gants hukumatdan iste’foga chiqqanidan so‘ng qabul qilgan. Bu haqda Ynet xabar berdi.
Netanyaxu o‘z qarorini 16-iyun kuni xavfsizlik masalalariga bag‘ishlangan Vazirlar mahkamasi yig‘ilishida ma’lum qilgan. Gants iste’foga chiqishidan oldin ham harbiy Vazirlar mahkamasi tarqatib yuborilishi, uning o‘rniga Netanyaxu vazirlar bilan tor doirada uchrashuvlar o‘tkazishda davom etishi kutilgandi.
Isroil sobiq mudofaa vaziri va bosh vazir o‘rinbosari Benni Gants 2023-yil 7-oktyabrda HAMASning Isroilga hujumidan so‘ng darhol bosh vazir Binyamin Netanyaxuning harbiy kabinetiga kirdi. Biroq o‘tgan hafta u Vazirlar mahkamasidan ketishini e’lon qildi va mamlakatda muddatidan oldin saylovlar o‘tkazishga chaqirdi. Yaqinda u Netanyaxuni ochiqchasiga tanqid qilib, uni G‘azo sektori uchun urushdan keyingi strategiyani taqdim eta olmaganlikda aybladi.
May oyi o‘rtalarida Benni Gants Isroil bosh vaziriga ultimatum qo‘yib, agar u 8-iyungacha G‘azo sektorida urushdan keyingi vaziyatni tartibga solish rejasini taqdim qilmasa, iste’foga chiqishini aytgandi. Gantsning fikricha, reja oltita strategik maqsadni o‘z ichiga olishi kerak, jumladan, garovga olinganlarni ozod qilish, HAMASni ag‘darish, G‘azo sektorini demilitarizatsiya qilish va uni nazorat qilish, AQSH, Yevropa Ittifoqi, arab davlatlari va falastinliklar ishtirokida anklavning “fuqarolik boshqaruvining xalqaro mexanizmi”ni yaratish.
Izoh (0)