Исроил бош вазири Биньямин Нетаньяху Жо Байден маъмуриятини танқид қилиши ортидан Вашингтон Исроил раҳбарияти билан ўтказилиши белгиланган стратегик учрашувни бекор қилди. Бу ҳақда Исроил нашрлари тарқатган хабарга асосланиб, Anadolu маълум қилди.
Манбада айтилишича, Исроил бош вазири АҚШ ва уни идора қилувчи Байден маъмуриятини қурол етказиб беришни кечиктиришда айблаган. Бунинг оқибатида АҚШ расмийлари Тель-Авив вакиллари билан 20 июнга белгиланган учрашувни бекор қилган.
“Сўнгги бир неча ой ичида АҚШ маъмурияти Исроилга қурол ва ўқ-дориларни бермай қўйганини тасаввур қилиш ҳам ғазабланарли”, — деган Нетаньяху сешанба куни Х тармоғида эълон қилган хабарида.
Манбада айтилишича, 20 июнга белгиланган учрашувда Исроил ва АҚШ Эрон ядро дастури ҳақида муҳокама олиб бориши керак бўлган. Ушбу учрашув Вашингтонда ўтказилиши режалаштирилган.
“Учрашув пайшанба куни Вашингтонда бўлиб ўтиши керак эди ва у биринчи навбатда Эрон ядро дастуридаги тараққиётга бағишланиши керак бўлган”, — деб ёзган Исроилнинг Haaretz газетаси.
Исроил ҳукумати АҚШ билан учрашувда иштирок этиш учун стратегик масалалар бўйича вазир Рон Дермер бошчилигидаги делегация тайинлаган. АҚШ томонидан эса миллий хавфсизлик бўйича маслаҳатчи Жейк Салливан қатнашиши керак бўлган.
Олдинроқ, президент Байден янги қуролларнинг юборилиши Исроилнинг мудофаа мақсадларига тўғри келмаслигини билдирган эди. Чунки Тель-Авив сўраган қуролларнинг аксарияти ҳужум қуроллари бўлган.
Исроил Мудофаа вазирлиги баёнотига кўра, июнь ойи бошида Исроил АҚШда ишлаб чиқарилган 25 та Ф-35 қирувчи самолётларини умумий қиймати 3 миллиард долларга сотиб олиш бўйича келишув имзолаган. Аммо бу самолётлар ҳали етказиб берилмаган.
Апрель ойида ҳам Байден маъмурияти Исроилга 26,4 миллиард долларлик ёрдам пакети ажратиш тўғрисидаги қарорни имзолаган. Шундан 14 миллиард доллар ҳарбий техникалар сотиб олиб бериш учун сарфланиши керак эди.
Изоҳ (0)