Kanada hukumati Erondagi islom inqilobi qo‘riqchilari korpusini terrorchi tuzilmalar ro‘yxatiga kiritgan. Bu haqda G‘arb nashrlariga tayanib, Al Jazeera xabar berdi.
Manbada aytilishicha, Kanadada Eron inqilobiy-harbiy guruh rasman terrorchi markazlar ro‘yxatiga kiritilgan. Kanada rasmiylari Erondagi fuqarolariga murojaat yo‘llab, mamlakatni tark etishni so‘ragan.
Eron islom inqilobi qo‘riqchilari korpusi Kanada tomonidan HAMAS va “Hizbulloh” bilan yaqin aloqalar o‘rnatishda ayblangan. Ushbu tuzilma, shuningdek, uni idora qiluvchi Eron hukumatiga “inson huquqlariga to‘liq eʼtiborsizlik ko‘rsatish” ayblovi qo‘yilgan.
Erondagi korpusni terrorizm moliyachisi sifatida ayblagan Kanada hukumati qarori 19-iyun kuni jamoatchilikka eʼlon qilingan. Ushbu guruh va unga daxldor tashkilotlar vakillarining Kanadaga kirishiga cheklov qo‘yilgan.
“Islom inqilobi qo‘riqchilari korpusining “qora ro‘yxat”ga kiritilishi Kanada hukumatining Eronning noqonuniy xatti-harakatlari va terrorizmni qo‘llab-quvvatlash tashabbuslari jazosiz qolmasligini taʼminlash bo‘yicha keng ko‘lamli saʼy-harakatlariga asoslanadi”. — deyilgan Kanada rasmiylari bayonotida.
Eron rasmiylari Kanada hukumati chiqargan qarorga munosabat bildirmagan. Eron OAVlarida ham bu mavzu yoritilmagan.
Maʼlumot o‘rnida, Eron islom inqilobi qo‘riqchilari korpusi 2019-yilda Qo‘shma Shtatlar tomonidan terrorchi guruhlar ro‘yxatiga kiritilgan. Ushbu guruh bilan aloqa uchun AQSHda uzoq muddatli qamoq jazosi belgilangan.
Izoh (0)