Afg‘oniston aholisi hayitni qanday nishonlaydi?

Mozori Sharifning bir qancha aholisi hayit bayramini qurbonlik qilish, yangi liboslar kiyib, do‘stlarining uylariga borish bilan nishonlaydi. “Daryo”ning Afg‘onistondagi muxbiri Qurbon hayiti arafasida shahar aholisi bilan suhbatlashib, bozorlardagi narx-navo bilan tanishdi.

Mozori Sharifning bir qator aholisi yangi kiyim-kechak, hayit dasturxoni uchun ho‘l va quruq mevalar xarid qilish maqsadida bozorga boradi. Hayitning ilk kunida imkoniyati bor odamlar hayit namozidan so‘ng qurbonlik qiladi va muhtojlarga qurbonlik go‘shtidan tarqatadi.

Qurbon hayiti rasman 3 kun bo‘lsa-da, Afg‘onistonda bir-birini ko‘rish va ziyorat qilish bir hafta davom etadi. Aholi orasida daromadi kamligi sababli hayit uchun yangi libos xarid qilish imkoniyati yo‘qlar uchrab turadi.

“To‘g‘risini aytsam, hozirgacha hech narsa olganimiz yo‘q, o‘tgan hayitda olgandim. Ishim yaxshi bo‘lsa, qurbonlik qilgan bo‘lardim. Oylik daromadim 5000 afg‘oni, qanday qurbonlik qilib, yangi liboslar sotib olaman” — deydi 20 yoshli Abdul Majid.

Ayni paytda shahardagi ayrim sotuvchilar o‘tgan hayitga qaraganda savdo sotiq kamayganini aytmoqda. “Daryo‘ muxbiri bilan suhbat qurgan Muhammad Nazar va Samadning Mozori Sharifda do‘konlari bor. Ular Qurbon hayiti arafasida savdo-sotiq yaxshi emasligi, ko‘pchilik quruq meva sotib olmasligini aytmoqda.

Biroq savdogar Rahmon Birdi Botur xarid bo‘yicha ijobiy natijalar kuzatilayotganini qayd etmoqda. U Ramazon va Qurbon hayitlari uning mollarini sotish uchun eng yaxshi imkoniyat ekanini ta’kidlagan.

“Allohdan Afg‘onistonda tinchlik, xavfsizlik va tinchlik o‘rnatilishini, tadbirkorlik rivojini so‘rayman”, — deydi u.

Hayit arafasida bozorda narxlar qanday?

“Daryo” muxbiri quruq mevalar va chorva mollarining bozordagi narxlari bilan tanishdi. Afg‘onistonning bir qancha viloyatlaridan Mozori Sharif bozoriga kelgan xaridorlar chorva narxi qimmatligidan shikoyat qilmoqda. Qurbon hayiti yaqinlashganda qoramol narxi har doim ikki baravar oshadi, deydi aholi.

• Qo‘y narxi 100 dollardan 350 dollargacha;
• Sigir narxi 350 dollardan 1400 dollargacha;
• Echki narxi 70 dan 300 dollargacha baholangan.

Ta’kidlash kerakki, Mozori Sharif molbozori Afg‘oniston shimolidagi eng yirik bozorlardan biri bo‘lib, u 5 milliondan ortiq qoramolni sig‘diradi. Quruq mevalar narxi esa quyidagicha:

• Afg‘on no‘xoti (1 kilosi uchun) — 2 dollar;
• O‘zbek no‘xoti — 3,82 sent;
• Qora mayiz — 3,54 sent;
• Yashil mayiz — 5 dollar;
• Qizil mayiz — 2 dollar;
• Bodom — 3 dollardan 20 dollargacha;
• Afg‘on pistasi — 21 dollar;
• Eron pistasi — 9 dollar;
• Xurmo — 1,50 sent;
• Yong‘oq — 5-10 dollar.