Афғонистон аҳолиси ҳайитни қандай нишонлайди?

Мозори Шарифнинг бир қанча аҳолиси ҳайит байрамини қурбонлик қилиш, янги либослар кийиб, дўстларининг уйларига бориш билан нишонлайди. “Дарё”нинг Афғонистондаги мухбири Қурбон ҳайити арафасида шаҳар аҳолиси билан суҳбатлашиб, бозорлардаги нарх-наво билан танишди.

Мозори Шарифнинг бир қатор аҳолиси янги кийим-кечак, ҳайит дастурхони учун ҳўл ва қуруқ мевалар харид қилиш мақсадида бозорга боради. Ҳайитнинг илк кунида имконияти бор одамлар ҳайит намозидан сўнг қурбонлик қилади ва муҳтожларга қурбонлик гўштидан тарқатади.

Қурбон ҳайити расман 3 кун бўлса-да, Афғонистонда бир-бирини кўриш ва зиёрат қилиш бир ҳафта давом этади. Аҳоли орасида даромади камлиги сабабли ҳайит учун янги либос харид қилиш имконияти йўқлар учраб туради.

“Тўғрисини айтсам, ҳозиргача ҳеч нарса олганимиз йўқ, ўтган ҳайитда олгандим. Ишим яхши бўлса, қурбонлик қилган бўлардим. Ойлик даромадим 5000 афғони, қандай қурбонлик қилиб, янги либослар сотиб оламан” — дейди 20 ёшли Абдул Мажид.

Айни пайтда шаҳардаги айрим сотувчилар ўтган ҳайитга қараганда савдо сотиқ камайганини айтмоқда. “Дарйў мухбири билан суҳбат қурган Муҳаммад Назар ва Самаднинг Мозори Шарифда дўконлари бор. Улар Қурбон ҳайити арафасида савдо-сотиқ яхши эмаслиги, кўпчилик қуруқ мева сотиб олмаслигини айтмоқда.

Бироқ савдогар Раҳмон Бирди Ботур харид бўйича ижобий натижалар кузатилаётганини қайд этмоқда. У Рамазон ва Қурбон ҳайитлари унинг молларини сотиш учун энг яхши имконият эканини таъкидлаган.

“Аллоҳдан Афғонистонда тинчлик, хавфсизлик ва тинчлик ўрнатилишини, тадбиркорлик ривожини сўрайман”, — дейди у.

Ҳайит арафасида бозорда нархлар қандай?

“Дарё” мухбири қуруқ мевалар ва чорва молларининг бозордаги нархлари билан танишди. Афғонистоннинг бир қанча вилоятларидан Мозори Шариф бозорига келган харидорлар чорва нархи қимматлигидан шикоят қилмоқда. Қурбон ҳайити яқинлашганда қорамол нархи ҳар доим икки баравар ошади, дейди аҳоли.

• Қўй нархи 100 доллардан 350 долларгача;
• Сигир нархи 350 доллардан 1400 долларгача;
• Эчки нархи 70 дан 300 долларгача баҳоланган.

Таъкидлаш керакки, Мозори Шариф молбозори Афғонистон шимолидаги энг йирик бозорлардан бири бўлиб, у 5 миллиондан ортиқ қорамолни сиғдиради. Қуруқ мевалар нархи эса қуйидагича:

• Афғон нўхоти (1 килоси учун) — 2 доллар;
• Ўзбек нўхоти — 3,82 сент;
• Қора майиз — 3,54 сент;
• Яшил майиз — 5 доллар;
• Қизил майиз — 2 доллар;
• Бодом — 3 доллардан 20 долларгача;
• Афғон пистаси — 21 доллар;
• Эрон пистаси — 9 доллар;
• Хурмо — 1,50 сент;
• Ёнғоқ — 5-10 доллар.