Ijtimoiy tarmoqlarda Toshkent shahrining Sergeli tumanida 58- va 131-yo‘nalishdagi ikkita avtobus avariyaga uchragani haqida xabarlar tarqaldi. Holat yuzasidan “Toshshahartransxizmat” AJ axborot xizmati munosabat bildirdi.
Maʼlum qilinishicha, hodisa 14-iyun kuni soat 16:14 larda sodir bo‘lgan. King Long rusumli 131-sonli yo‘nalish haydovchisi R.B. boshqaruvidagi avtobus Sergeli tumani Yangi Sergeli ko‘chasi bo‘ylab harakatlanib, piyodalar o‘tish yo‘lagida piyodani o‘tkazish uchun to‘xtagan. Shu vaqtda orqadan oraliq masofa saqlamay harakatlanib kelayotgan King Long rusumli 58-sonli yo‘nalish haydovchi K.B. boshqaruvidagi avtobus urilgan.
Hodisa oqibatida avtobus haydovchisi, chiptachisi va 2 nafar yo‘lovchilari tan jarohati olgan, avtobuslar texnik shikastlangan.
Holat yuzasidan “Toshshahartransxizmat” AJ Harakat xavfsizligini nazorat qilish bo‘limi tomonidan xizmat tekshiruvi o‘tkazilishi belgilandi.
“Hozirda ushbu yo‘l-transport hodisasi Toshkent shahar IIBB YHXB MDX tezkor guruhi xodimlari tomonidan o‘rnatilgan tartibda rasmiylashtirilganini maʼlum qilamiz”, — deyiladi xabarda.
Izoh (0)