Ижтимоий тармоқларда Тошкент шаҳрининг Сергели туманида 58- ва 131-йўналишдаги иккита автобус аварияга учрагани ҳақида хабарлар тарқалди. Ҳолат юзасидан “Тошшаҳартрансхизмат” АЖ ахборот хизмати муносабат билдирди.
Маълум қилинишича, ҳодиса 14 июнь куни соат 16:14 ларда содир бўлган. King Long русумли 131-сонли йўналиш ҳайдовчиси Р.Б. бошқарувидаги автобус Сергели тумани Янги Сергели кўчаси бўйлаб ҳаракатланиб, пиёдалар ўтиш йўлагида пиёдани ўтказиш учун тўхтаган. Шу вақтда орқадан оралиқ масофа сақламай ҳаракатланиб келаётган King Long русумли 58-сонли йўналиш ҳайдовчи К.Б. бошқарувидаги автобус урилган.
Ҳодиса оқибатида автобус ҳайдовчиси, чиптачиси ва 2 нафар йўловчилари тан жароҳати олган, автобуслар техник шикастланган.
Ҳолат юзасидан “Тошшаҳартрансхизмат” АЖ Ҳаракат хавфсизлигини назорат қилиш бўлими томонидан хизмат текшируви ўтказилиши белгиланди.
“Ҳозирда ушбу йўл-транспорт ҳодисаси Тошкент шаҳар ИИББ ЙҲХБ МДХ тезкор гуруҳи ходимлари томонидан ўрнатилган тартибда расмийлаштирилганини маълум қиламиз”, — дейилади хабарда.
Изоҳ (0)