Rossiya prezidenti Sankt-Peterburg Xalqaro iqtisodiy forumi doirasida Jahon axborot agentliklari vakillari bilan uchrashdi. Putin jurnalistlar bilan suhbat davomida Sovet Ittifoqi qayta tiklanmasligini ma’lum qildi. Lekin bundan oldin rus propagandachilari SSSRni tiklash borasida jar solishayotgan edi. Shuningdek, Vladimir Putinning o‘zi ham XX asrning eng yirik fojeasi sifatida SSSRning parchalanishini ko‘rar edi.
Siyosatshunos Oybek Sirojov va Zokir Usmonov “Daryo” bilan suhbatda Rossiya prezidentining Sovet Ittifoqini tiklash borasidagi yondashuvlari o‘zgarib qolgani haqida gapirib o‘tdi.
Siyosatshunos Oybek Sirojovning aytishicha, Ukrainada harbiy harakatlarni amalga oshirishdan oldin Rossiyada Sovet Ittifoqini tiklash borasida rejalar bo‘lgan.
“Bugungi kunda Rossiya oldida turgan eng muhim masala bu — Sovet Ittifoqini qayta tiklash emas, balki Rossiyaning yaxlitligini saqlab qolish hisoblanadi. Rossiya Ukrainada harbiy harakatlarni amalga oshirishdan oldin bunday reja bo‘lgan. Masalan, Sovet Ittifoqi paydo bo‘lish tarixini olaylik. 3 ta slavyan mamlakat — Rossiya, Belarus va Ukraina birlashib, SSSR tashkil etilgan. Amerikalik siyosatshunos olim Zbegnev Brejenskiyning yondashuviga ko‘ra, Ukraina geosiyosiy nuqtayi nazardan muhim hudud. Shu nuqtayi nazardan Putinda Ukrainani egallash orqali SSSRga o‘xshash formatda ittifoqni qurish orzusi bo‘lgan”, — dedi siyosatshunos.
Oybek Sirojovning qo‘shimcha qilishicha, bugungi kunda Rossiya prezidenti Vladimir Putin SSSRni qayta tiklash borasidagi orzularini amalga oshirib bo‘lmasligini anglab yetgan.
“Bugun Putin bu orzularini amalga oshirib bo‘lmasligini anglab yetdi. Bunga bir qancha omillar sabab bo‘ldi. Birinchisi — Ukrainani uch kun ichida taslim qila olmagani. Ikkinchisi — G‘arb tomoni har qanday sharoitda Ukrainani Rossiya qo‘liga berib qo‘ymaslikni aytdi. Menimcha, bugun Rossiya bosib olgan hududlarni o‘z tarkibiga qo‘shib olish orqali muzokara stoliga o‘tirmoqchi. Shuning uchun Putin oldida turgan asosiy masala — SSSRni qayta tiklash emas, balki Rossiyani saqlab qolish”, — dedi Oybek Sirojov.
Suhbatda ishtirok etayotgan siyosatshunos Zokir Usmonov bo‘lsa, Sovet Ittifoqini tiklash rejasi 1990-yillarda ishlab chiqilganini ma’lum qildi.
“Aslida, Sovet Ittifoqini qayta tiklash rejasi 1990-yillarda Aleksandr Soljenestin o‘zining “Rossiyani qanday qilib qurishimiz kerak?” deb nomlangan asarida Rossiyani imperiya sifatida tiklash uchun Ukraina, Belarus va Qozog‘istonni egallash kerakligini yozadi. 2000-yillarda bu g‘oya kuchayib ketdi. Rossiyadek davlatga ishonib bo‘lmaydi. Putin Ukraina urushi boshlanishidan oldin ham bostirib kirmaslik haqida va’da bergan edi. Agar Sovet Ittifoqi qayta tiklansa, bu davlat aholisining yarmi musulmonlar bo‘ladi. Agar bunday bo‘lsa, mazmun yo‘qoladi. Bu narsani Putinning o‘zi ham tilga olib o‘tdi”, — dedi siyosatshunos.
Oybek Sirojovning ta’kidlashicha, agar Sovet Ittifoqi tiklanganda ham, uni saqlab qolish juda mushkul ish.
“Katta imperiyani shakllantirish uchun juda katta resurs kerak. Xo‘p, SSSR qayta tiklandi ham deylik, lekin uni ushlab qolish masalasi ham bor. Bundan tashqari, bunga yirik geosiyosiy o‘yinchilar rozi bo‘lmaydi. Barcha narsani amalga oshirishda xohish emas, balki resurs asos hisoblanadi”, — deya aytib o‘tdi siyosatshunos.
Izoh (0)