Россия президенти Санкт-Петербург Халқаро иқтисодий форуми доирасида Жаҳон ахборот агентликлари вакиллари билан учрашди. Путин журналистлар билан суҳбат давомида Совет Иттифоқи қайта тикланмаслигини маълум қилди. Лекин бундан олдин рус пропагандачилари СССРни тиклаш борасида жар солишаётган эди. Шунингдек, Владимир Путиннинг ўзи ҳам ХХ асрнинг энг йирик фожеаси сифатида СССРнинг парчаланишини кўрар эди.
Сиёсатшунос Ойбек Сирожов ва Зокир Усмонов “Дарё” билан суҳбатда Россия президентининг Совет Иттифоқини тиклаш борасидаги ёндашувлари ўзгариб қолгани ҳақида гапириб ўтди.
Сиёсатшунос Ойбек Сирожовнинг айтишича, Украинада ҳарбий ҳаракатларни амалга оширишдан олдин Россияда Совет Иттифоқини тиклаш борасида режалар бўлган.
“Бугунги кунда Россия олдида турган энг муҳим масала бу — Совет Иттифоқини қайта тиклаш эмас, балки Россиянинг яхлитлигини сақлаб қолиш ҳисобланади. Россия Украинада ҳарбий ҳаракатларни амалга оширишдан олдин бундай режа бўлган. Масалан, Совет Иттифоқи пайдо бўлиш тарихини олайлик. 3 та славян мамлакат — Россия, Беларусь ва Украина бирлашиб, СССР ташкил этилган. Америкалик сиёсатшунос олим Збегнев Бреженскийнинг ёндашувига кўра, Украина геосиёсий нуқтайи назардан муҳим ҳудуд. Шу нуқтайи назардан Путинда Украинани эгаллаш орқали СССРга ўхшаш форматда иттифоқни қуриш орзуси бўлган”, — деди сиёсатшунос.
Ойбек Сирожовнинг қўшимча қилишича, бугунги кунда Россия президенти Владимир Путин СССРни қайта тиклаш борасидаги орзуларини амалга ошириб бўлмаслигини англаб етган.
“Бугун Путин бу орзуларини амалга ошириб бўлмаслигини англаб етди. Бунга бир қанча омиллар сабаб бўлди. Биринчиси — Украинани уч кун ичида таслим қила олмагани. Иккинчиси — Ғарб томони ҳар қандай шароитда Украинани Россия қўлига бериб қўймасликни айтди. Менимча, бугун Россия босиб олган ҳудудларни ўз таркибига қўшиб олиш орқали музокара столига ўтирмоқчи. Шунинг учун Путин олдида турган асосий масала — СССРни қайта тиклаш эмас, балки Россияни сақлаб қолиш”, — деди Ойбек Сирожов.
Суҳбатда иштирок этаётган сиёсатшунос Зокир Усмонов бўлса, Совет Иттифоқини тиклаш режаси 1990 йилларда ишлаб чиқилганини маълум қилди.
“Аслида, Совет Иттифоқини қайта тиклаш режаси 1990 йилларда Александр Солженестин ўзининг “Россияни қандай қилиб қуришимиз керак?” деб номланган асарида Россияни империя сифатида тиклаш учун Украина, Беларусь ва Қозоғистонни эгаллаш кераклигини ёзади. 2000 йилларда бу ғоя кучайиб кетди. Россиядек давлатга ишониб бўлмайди. Путин Украина уруши бошланишидан олдин ҳам бостириб кирмаслик ҳақида ваъда берган эди. Агар Совет Иттифоқи қайта тикланса, бу давлат аҳолисининг ярми мусулмонлар бўлади. Агар бундай бўлса, мазмун йўқолади. Бу нарсани Путиннинг ўзи ҳам тилга олиб ўтди”, — деди сиёсатшунос.
Ойбек Сирожовнинг таъкидлашича, агар Совет Иттифоқи тикланганда ҳам, уни сақлаб қолиш жуда мушкул иш.
“Катта империяни шакллантириш учун жуда катта ресурс керак. Хўп, СССР қайта тикланди ҳам дейлик, лекин уни ушлаб қолиш масаласи ҳам бор. Бундан ташқари, бунга йирик геосиёсий ўйинчилар рози бўлмайди. Барча нарсани амалга оширишда хоҳиш эмас, балки ресурс асос ҳисобланади”, — дея айтиб ўтди сиёсатшунос.
Изоҳ (0)