Jahon banki O‘zbekistonga energotariflar islohotining aholi ijtimoiy zaif qatlamiga ta’sirini yumshatish maqsadida 7,5 million dollar miqdoridagi 1-transh mablag‘ini ajratdi. Bu haqda Iqtisodiyot va moliya vazirligi xabar berdi.
Qayd etilishicha, O‘zbekiston prezidentining qaroriga asosan mamlakatda Jahon banki ko‘magida “Energetika islohotlari uchun innovatsion uglerod resurslarini qo‘llash” (iCRAFT) loyihasi amalga oshirilmoqda.
Loyihaning “Qisqartirilgan emissiyalarni sotib olish shartnomasi” (ERPA) komponenti doirasidagi islohotlarni, xususan, energiya tariflari islohotining aholining ijtimoiy zaif qatlamlariga bo‘lgan taʼsirini yumshatish va ularni moddiy qo‘llab-quvvatlash maqsadida Jahon banki tomonidan 7,5 million dollar miqdorida 1-transh mablag‘lari ajratilgan.
1-transh mablag‘lari – xalqaro issiqxona gazlari savdosi simulyatsiyasi sifatida O‘zbekistonga qaytarib beriladigan qisqartirilgan issiqxona gazlari emmisiyasi uchun ajratilgan grant mablag‘lari hisoblanadi.
iCRAFT loyihasi O‘zbekistonda Jahon banki ishtirokida amalga oshirilayotgan energetika sohasidagi islohotlarni qo‘llab-quvvatlash bo‘yicha dunyodagi birinchi global tashabbusi bo‘lib, islohotlar natijasida issiqxona gazlari emissiyalarini kamaytirishga va ularning bir qismini xalqaro bozorlarda savdosini yo‘lga qo‘yishga qaratilgan.
Avvalroq Jahon banki yangi prognozlariga ko‘ra, O‘zbekiston iqtisodiyoti 2024-yilda 5,3 foizga, 2025-yilda 5,5 foizga, 2026-yilda esa 5,7 foizga o‘sishi to‘g‘risida xabar berilgandi.
Izoh (0)