O‘zbekiston hukumati va Jahon banki o‘rtasida energiya samaradorligini oshirish va mamlakatdagi degradatsiyaga uchragan o‘rmon yerlarini tiklash bo‘yicha 296 mln dollarlik shartnomalar imozlandi. Bu haqda “Daryo”ga Jahon bankining O‘zbekistondagi vakolatxonasi xabar bermoqda.
Ma’lum bo‘lishicha, O‘zbekistonga jamoat binolarining energiya samaradorligini oshirish loyihasini moliyalashtirish va qurilish sektorida “yashil” energiyaga investitsiyalarni jalb qilish bo‘yicha institutsional va normativ-huquqiy bazani ishlab chiqish uchun 143 mln dollar imtiyozli kredit ajratiladi.
Shuningdek, O‘zbekistonga mamlakatning turli hududlarida landshaftlar barqarorligini oshirish va o’rmonlarni qayta tiklashga, shuningdek, O‘zbekistonning transchegaraviy tabiiy zonalarni tiklash bo‘yicha Markaziy Osiyodagi boshqa davlatlar bilan hamkorligini rivojlantirishga ko’maklashish uchun 142 million dollar miqdorida imtiyozli kredit ajratiladi.
Bundan tashqari ushbu masalalar bo‘yicha yana 11 mln dollarlik grant mablag‘lari ham ajratilgan.
Qayd etilishicha, ushbu loyihalar bo‘yicha imtiyozli moliyalashtirish O‘zbekiston hukumatiga Xalqaro taraqqiyot assotsiatsiyasi (Jahon banki guruhi tarkibiga kiruvchi) tomonidan past foiz stavkasida, 30 yil muddatga, shu jumladan besh yillik imtiyozli davr bilan taqdim etiladi.
Izoh (0)