Jahon banki ijrochi direktorlar kengashi O‘zbekiston uchun 100 million dollar miqdorida imtiyozli kreditni tasdiqladi.
Qayd etilishicha, ushbu mablag‘lar “Aholining ijtimoiy himoyaga muhtoj qatlamlarini ijtimoiylashuvini taʼminlash uchun innovatsion ijtimoiy himoya tizimi” (“Inson”) loyihasini amalga oshirishga taqdim etiladi. Loyihaning maqsadi aholining ijtimoiy himoyaga muhtoj qatlamlariga mansub odamlar uchun ijtimoiy xizmatlardan foydalanish imkoniyati va ularning sifatini yaxshilashdir.
Loyiha qo‘shimcha ravishda Jahon banki qoshidagi “Erta yoshdagi taʼlim uchun hamkorlik” ko‘p tomonlama donorlik trast jamg‘armasi tomonidan taqdim etilgan 2 million dollarlik grant vositasida moliyalashtiriladi.
Jamg‘arma faoliyati dunyoning turli mamlakatlaridagi ijtimoiy himoyaga muhtoj bolalarning rivojlanishi va taʼlimini qamrab oladi. Ushbu mablag‘lar mahalliy jamoalar (mahallalar) darajasida ko‘rsatilayotgan ijtimoiy xizmatlarning O‘zbekistondagi ijtimoiy himoyaga muhtoj bolalar farovonligiga taʼsirini baholash va ularning sifatini oshirish uchun yo‘naltiriladi.
Biz O‘zbekiston hukumatining ijtimoiy himoyaga muhtoj aholini har tomonlama va samarali qo‘llab-quvvatlash maqsadida milliy ijtimoiy himoya tizimi salohiyatini rivojlantirishga qaratilgan saʼy-harakatlarini olqishlaymiz. Loyiha O‘zbekistonda “g‘amxo‘rlik iqtisodiyoti” sektorining huquqiy va institutsional asoslarini rivojlantirishga ko‘maklashadi, — deydi Jahon bankining O‘zbekistondagi vakolatxonasi rahbari Marko Mantovanelli.
Loyiha O‘zbekiston prezidenti huzuridagi Ijtimoiy himoya milliy agentligi (IHMA) tomonidan mamlakatning turli davlat organlari, nodavlat tashkilotlari va ijtimoiy-iqtisodiy rivojlanish masalalari bo‘yicha xalqaro hamkorlar bilan amalga oshiriladi.
Prezident huzurida Ijtimoiy himoya milliy agentligi davlat rahbarining 2023-yil 1-iyundagi farmoni bilan tashkil etilgandi. Uning Qoraqalpog‘iston Respublikasi, viloyatlar va Toshkent shahar boshqarmalari hamda tuman (shahar)larda “Inson” ijtimoiy xizmatlar markazlari ham tashkil etildi.
Izoh (0)