Rossiyaning “Gazprom” kompaniyasining gaz qazib olish hajmi 2022-yilgi 412,9 milliard kubometrdan 2023-yili 13 foizga (359 mlrd kubometr) tushdi. Bu haqda korporatsiyaning yillik hisobotiga tayanib, “Korrespondent.net” xabar berdi.
Hisobotga ko‘ra, 2021-yilda qazib olingan gaz miqdori 515 milliard kubometrga yetgan, so‘nggi ikki yilda esa bu ko‘rsatkich 30 foizga pasaygan. “Gazprom” tomonidan Rossiya hududida neft va gaz kondensati olinishi 2022-yildagi 67,9 million tonnadan 2023-yilda 6,6 foizga (72,38 million tonna) o‘sgan.
Kompaniya 2023-yil ichki va tashqi bozorlarda 342 milliard kubometr gaz sotgan, bu avvalgi yilga nisbatan 10 foizga kam. O‘shanda 379,8 milliard kubometr gaz eksport qilingandi. 2023-yilda qo‘shni bozorlarga gaz yetkazib berishning umumiy hajmi 2022-yil darajasida saqlanib qolgan.
2023-yil “Gazprom” 629 milliard rubl sof zarar ko‘rdi, bu daromadning 27 foizga kamayganini ko‘rsatadi. Shu sababli kompaniya Moskva va Moskva viloyatidagi yirik ko‘chmas mulk obyektlari uchun xaridorlar qidirayotganini e’lon qildi. Sotiladigan obyektlar qatoriga Stroiteley ko‘chasidagi ofis binolari, Pervomayskoye qishlog‘idagi Imperial Park Hotel & Spa sanatoriy majmuasi, Novocheremushkinskaya ko‘chasidagi obyekt va kompaniyaning Moskvadagi bosh ofisi yaqinidagi 96 ta avtoturargoh kiradi.
Izoh (0)