“Gazprom” Qirg‘iziston bilan Qozog‘iston orqali gaz yetkazib berish bo‘yicha 15 yillik shartnomalar tuzdi. Bu haqda kompaniya matbuot xizmati xabar berdi.
Tegishli shartnomalar Sankt-Peterburg xalqaro iqtisodiy forumi (SPIEF 2024) doirasida “Gazprom eksport” va “Gazprom Qirg‘iziston” MChJ o‘rtasida imzolangan. Ushbu shartnomalar bo‘yicha yetkazib berish 2025–2040-yillarda amalga oshiriladi.
“Gazprom” Qozog‘istonning QazaqGaz neft kompaniyasi bilan Rossiya gazini O‘zbekiston va Qirg‘izistonga tashish bo‘yicha xizmatlar ko‘rsatish yuzasidan uzoq muddatli shartnomalar imzolagan. Ushbu shartnomalarning amal qilish muddati ham 2025–2040-yillarni tashkil etadi.
“Tranzitni taʼminlash uchun, xususan, “Markaziy Osiyo – Markaz” gaz quvurlari tizimi negizida maxsus ajratilgan marshrutni kengaytirish, Qozog‘istonda gaz uzatish quvvatlarini rivojlantirish bo‘yicha boshqa loyihalarni amalga oshirish ko‘zda tutilgan”, — deyiladi xabarda.
“Gazprom” o‘z xabarlarida tranzit va ta’minot hajmini ko‘rsatmagan. “Kommersant” gazetasi manbalarga tayanib xabar berishicha, 2023-yilda O‘zbekistonga yetkazib berish narxi ming kub metr uchun 160 dollarni tashkil qilgan.
Mart oyida Qirg‘iziston energetika vaziri o‘rinbosari Talaybek Boyg‘oziyev Qirg‘iziston “Gazprom” bilan 0,5 milliard kub metrdan ortiq gazni yetkazib berish masalasini muhokama qilayotganini aytgandi. Uning aniqlik kiritishicha, respublika hozirda yiliga qariyb 300–340 million kub metr gaz import qiladi va yaqin kelajakda bu hajmni 1 milliard kub metrga yetkazishni rejalashtirmoqda.
2023-yil oxirida “Gazprom” rahbari Aleksey Miller Qirg‘iziston, Qozog‘iston va O‘zbekiston bilan 15 yillik shartnomalar tuzilganini e’lon qilgandi. U shartnomalar bo‘yicha Markaziy Osiyo respublikalariga barqaror yetkazib berish 2025-yil 1-noyabrdan boshlanishini ma’lum qilgan.
Izoh (0)